सर्लाहीमा ई–पासपोर्ट वितरण शुरु

माघ ६, सर्लाही । जिल्ला प्रशासन कार्यालयले ई–पासपोर्ट (विद्युतीय राहदानी) वितरण सेवा थालनी गरेको छ । 

राहदानी विभाग काठमाडौंबाट पहिलोपटक १५६ सेवाग्राहीको ई–पासपोर्ट छापिएर आएपछि सो सेवा शुरु गरेको प्रमुख अधिकारी थानेश्वर गौतमले जानकारी दिए । उनका अनुसार तीन जना सेवाग्राहीलाई ई–पासपोर्ट प्रदान गरी कार्यक्रमको सुरुआत गरिएको हो ।

ई–पासपोर्ट छापिएर आएका अन्य सेवाग्राहीले पनि कार्यालयमा आएर आ–आफ्नो पासपोर्ट लिन सक्ने र आवेदन पेश भएको १५ दिनभित्र सेवाग्राहीलाई इ–पासपोर्ट वितरण उपलब्ध गराइने उनले बताए । 

लामो समयसम्म प्रयोगमा रहेको हस्तलिखित पासपोर्टलाई विस्थापित गरेर एमआरपी लागू गरेको राहदानी विभागले करीब ११ वर्ष पछि ई–पासपोर्ट प्रयोगमा ल्याएको छ । 

विभागले दिने राहदानीमा विद्युतीय चाप हुने र यसमा सम्बन्धित व्यक्तिका विवरण समाविष्ट हुने कार्यालयले जानकारी दिएको छ । 

एमआरपीका तुलनामा ई–पासपोर्ट बढी विश्वसनीय र सुरक्षित हुने जनकारी दिइएको छ । जिल्लाबाटै सो सेवा पाइने भएपछि सेवाग्राहीलाई काठमाडौं धाउनुपर्ने बाध्यता अन्त्य भएको छ । साथै धेरै समय पर्खिनुपर्ने बाध्यता पनि हटेको छ । रासस

प्रतिक्रिया [0]