स्रोत नखुलेको ६३ लाखसहित महोत्तरीबाट तीन जना युवक पक्राउ

चैत १७, जलेश्वर । विगत पाँच दिनको अवधिमा महोत्तरीमा स्रोत नखुलेको रू. ६३ लाखसहित तीन जना पक्राउ परेका छन् । 

जिल्ला प्रहरी कार्यालयका प्रहरी नायव उपरीक्षक प्रकाश विष्टका अनुसार गत आइतवार रू. ५५ लाखसहित दुई युवक पक्राउ परेका थिए भने  बिहीवार रू. ८ लाखसहित थप एक युवक पक्राउ परे ।

जिल्लाको जलेश्वर–बर्दिबास सडकखण्डको औरहीमा गत आइतवार दिउँसो स्रोत नखुलेको रू. ५५ लाखसहित औरही नगरपालिका–२ चेपकट गाउँ बस्ने २० वर्षीय धीरजकुमार यादव र सोही स्थान निवासी १८ वर्षीय रमेशकुमार सहनी पक्राउ परेका थिए । 

ज ९प ८२४७ नं को मोटरसाइकलमा बसेर कालो झोलामा रू. ५५ लाख बोकी गइरहको अवस्थामा प्रहरीले शंका लागि जाँच गर्दा उनीहरु पक्राउ परेका थिए । रकमको स्रोत खुलाउन नमानेपछि उनीहरुलाई प्रहरीले कारबाहीका लागि बरामद रकमसहित जलेश्वर भन्सार कार्यालयमा बुझाएको थियो ।

त्यसैगरी, भारतबाट स्रोत नखुलेको करीब रू. आठ लाखसहित नेपाल प्रवेश गरेका औरही नगरपालिका–५ बस्ने रामश्रेष्ठ दासका छोरा २० वर्षीय वीरेन्द्रकुमारलाई गएराति प्रहरीले पक्राउ गरेको थियो । 

भारत बिहारको कन्हमा सहरबाट कम्मरमा बेरेको कपडा भित्र रकम राखी  साइकलमा सम्सी गाउँपालिका–स्थित प्रहरीचौकी नजिक आउँदै गरेका उनीमाथि शंका लागि जाँच गर्दा प्रहरीले स्रोत नखुलेको रू. सात लाख ९१ हजार बरामद गरेको थियो । 

पक्राउ परेका  दासलाई गएराति नै मुख्य भन्सार कार्यालय जलेश्वरमा लगिएकामा कार्यालय बन्द भएकाले बिहीवार  बुझाइएको प्रहरी नायव उपरीक्षक विष्टले बताए ।  रासस

प्रतिक्रिया [0]