बारामा १५ हजार ५१० हेक्टरमा चैते धानखेती

कलैया । बारामा आर्थिक वर्ष २०७८/०७९ मा कृषकले कुल १५ हजार ५१० हेक्टर क्षेत्रफलमा विभिन्न जातको चैते धानखेती गरेको कृषि ज्ञान केन्द्रले बताएको छ ।

भदैया, अगहनी धानको उत्पादकत्वभन्दा बढी उत्पादन दिने भएको हुनाले कृषकले आफ्नो साधनस्रोतबाट सिँचाइको राम्रो व्यवस्था गरेका कारण चैते धान खेतीतर्फ कृषक आकर्षित हुँदै गएको ज्ञान केन्द्रका प्रमुख जितेन्द्र यादवले जानकारी दिए । आर्थिक वर्ष २०७७/०७८ मा कृषकले कुल १२ हजार ११५ हेक्टर क्षेत्रफलमा चैते धानखेती गरिएको थियो । गत साल भदैया धान प्रतिहेक्टर ४ दशमलव ३ मेट्रिकटन, अगहनी धान ४ दशमलव १५ मेट्रिकटनका दरले उत्पादन भएको थियो ।

यस वर्ष कृषकले हर्दिनाथ १, चैते १, २, र चैते ४ जातको धानखेती गरी १५ हजार ५१० हेक्टर क्षेत्रफलमा खेती गरिएको कृषि ज्ञानकेन्द्रका कृषि विज्ञ राजकरण चौरसियाले जानकारी दिए । चैते धान प्रतिहेक्टर ४ दशमलव ६३ मेट्रिकटनले दरले ६९ हजार ९७२ मेट्रिकटन उत्पादन भएको केन्द्रले बताएको छ । रासस

प्रतिक्रिया [0]