४४ % बढ्यो वीरगञ्ज नाकाबाट वैदेशिक व्यापार,५ खर्ब ७७ अर्बको आयात हुँदा निर्यात ७३ अर्ब

अभियान संवाददाता

जेठ २८, वीरगञ्ज । आयातनिर्यात व्यापार परिमाणका आधारमा सबैभन्दा ठूलो भन्सार वीरगञ्जबाट चालू आर्थिक वर्ष (आव) २०७८/ ७९ को १० महीनामा वैदेशिक व्यापार ४४ प्रतिशतले बढेको छ । 

वीरगञ्ज भन्सार कार्यालयका अनुसार चालू आवको साउनदेखि वैशाखसम्ममा कुल ६ खर्ब ५० अर्ब रुपैयाँको वैदेशिक व्यापार भएको छ । यो अघिल्लो आवको समीक्षा अवधिको तुलनामा करीब २ खर्ब रुपैयाँले बढी हो । 

आव २०७७/ ७८ को साउनदेखि वैशाखसम्ममा ४ खर्ब ५२ अर्ब रुपैयाँ बराबरको वैदेशिक व्यापार भएको भन्सारको तथ्यांकले देखाउँछ । अघिल्लो आवमा कोरोना महामारीका कारण आयात निर्यात र बजार खुम्चिएकाले वैदेशिक व्यापार पनि कम भएको थियो । 

यसवर्ष बजार खुल्दा माग र मूल्य दुवै बढेकाले त्यसको प्रभाव व्यापारमा देखिएको वीरगञ्ज भन्सारका प्रमुख भन्सार अधिकृत हरिहर पौडेलले बताए । ‘महामारी मत्थर भएसँगै बजार खुल्दा त्यसअघि खुम्चिएको मागको दबाब बढ्यो । इन्धन र वस्तुको मूल्यमा अन्तरराष्ट्रियस्तरमै भएको वृद्धिले पनि व्यापारको मूल्य बढी देखिएको हो’, प्रमुख भन्सार अधिकृत पौडेलको बुझाइ छ । 

वीरगञ्ज नाकाबाट १० महीनामा ५ खर्ब ७७ अर्ब रुपैयाँको आयात हुँदा निर्यात भने ७३ अर्ब रुपैयाँको मात्रै भएको भन्सारको तथ्यांक छ । तर, यो अघिल्लो आवको सोही अवधिभन्दा ९३ प्रतिशत बढी हो । समीक्षा अवधिमा यो नाकाबाट ३७ अर्ब रुपैयाँका विभिन्न स्वदेशी उत्पादन निकासी भएको थियो ।

यो नाकाको कुल व्यापारबाट मात्रै नेपाललाई ५ खर्ब ३ अर्ब रुपैयाँ व्यापारघाटा भएको भन्सारको तथ्यांकले देखाउँछ । यो अघिल्लो वर्षको समीक्षा अवधिको तुलनामा ३४ प्रतिशत बढी हो । सो अवधिमा यस्तो घाटा ३ खर्ब ७६ अर्ब रुपैयाँ बराबर थियो । 

वीरगञ्जबाट मुख्यरुपमा सवारी साधन, पेट्रोलियम पदार्थ, औद्योगिक कच्चा पदार्थको आयात हुन्छ । यो नाकाबाट आयात हुने मुख्य २० ओटामध्ये १९ ओटा यस्तै वस्तु पर्दछन् । यो नाकाबाट तयारी कपडा पनि उल्लेख्य परिमाणमा आयात भएको देखिन्छ । तयारी कपडामात्रै साढे ७ अर्ब रुपैयाँको भित्रिएको छ । 

वीरगञ्जबाट भटमास, पाम र सूर्यमुखीको प्रशोधित तेल, कपडा, धागो, कुकुर वा विरालोको खाना, पिना, गलैंचा र दन्तमन्जन निर्यात भएको भन्सारले बताएको छ । जुत्ता, औषधीका कच्चा पदार्थ, तयारी कपडा, बोरा र झोला पनि निकासी हुँदै आएको छ । 
 

प्रतिक्रिया [0]