निर्देशन नटेर्ने विद्यालयलाई कारवाही गर्ने वीरगञ्ज महानगरको चेतावनी

अभियान संवाददाता

साउन २, वीरगञ्ज  ।अत्याधिक गर्मी बढेपछि साउन २० गतेसम्मका लागि वीरगञ्जका विद्यालय बन्द गर्न दिइएको निर्देशन विद्यालयले पालना गरेका छैनन् ।

निर्देशन पालना नभएको पाइएपछि वीरगञ्ज महानगरले निर्देशा पालना नगर्ने विद्यालयलाई कारवाहीको चेतावनी दिएको छ । बढ्दो गर्मीका कारण बालबालिकाको स्वास्थ्यमा प्रतिकूल असर पर्ने भन्दै महानगरले शुरूमा असारको २९ देखि ३१ गतेसम्म विद्यालय बन्द गर्ने सूचना निकालेको थियो । 

महानगरले गर्मी बढ्दै गएपछि पुनः अर्को सूचना निकालेर साउन २० गतेसम्म बिदा लम्ब्याएको हो । यो बिदा वर्षे बिदामा समायोजन हुने महानगरले बताएको छ । 
महानगरका केही सामुदायिक तथा संस्थागत विद्यालयले निर्देशन अवज्ञा गरेको पाइएकाले त्यस्ता विद्यालयलाई कारवाही गर्ने महानगरका शिक्षा अधिकृत हरि राउतले जारी गरेको सूचनामा उल्लेख छ । 

केही विद्यालयहरूले बिदा दिएका छन् भने कतिपयले अनलाइनमार्फत् कक्षा सञ्चालन गरेका छन् । 

प्रतिक्रिया [0]