निष्कासनमा परेका कर्मचारीको आन्दोलनले इनरुवा नगरको काम १० दिनदेखि ठप्प 

अभियान संवाददाता

साउन १०, सुनसरी । करार अवधि नथपिएका कर्मचारीको आन्दोलनले सुनसरीको इनरुवा नगरपालिकाको काम १० दिनदेखि ठप्प बनेको छ । नगरपालिकाले ५७ जना कर्मचारीहरूको करार अवधि नथपेपछि उनीहरू आन्दोलित बनेका हुन् । 

नगरपालिकाले साउन १ गतेदेखि लागू हुने गरी ५७ जना कर्मचारीहरूको करार सेवाबाट हटाएको थियो । तर, ७९ जनाको भने करार अवधि थप गरेको थियो । 
नगरपालिकाले कार्य मूल्यांकनको आधार देखाउँदै ती कर्मचारीहरूको करार अवधि नथपेको जनाएको छ । निष्कासनका परेका कर्मचारीले भने राजनीतिक पहुँच नभएकालाई मात्रै हटाएको आरोप लगाएका छन् । 

कर्मचारी आन्दोलनका कारण नगरसहित वडाको कामकाज प्रभावित बनेको छ । 

नगरपालिकाका मेयर केदार भण्डारीले आवश्यक नभएका कर्मचारी हटाइएको बताए । नगरपालिकाले आर्थिक भार व्यहोरेर त्यति धेरै कर्मचारी राख्न नसक्ने उनको भनाइ थियो । साथै उनले करार अवधि नथपिएकाको म्याद थप नहुनेसमेत बताए ।
 

प्रतिक्रिया [0]