बैंकहरूले कर्जा लगानी रोक्दा वीरगञ्ज नाकामा थुप्रिए १७ सय गाडी 

अभियान संवाददाता

साउन २८, वीरगञ्ज । विदेशी मुद्रा सञ्चितिमा परेको दबाब समाधान गर्न भन्दै सरकारले आयातमा गरेको कडाई र तरलता अभावलाई कारण देखाएर बैंकहरूले कर्जा लगानी रोकेपछि मुख्य भन्सार वीरगञ्जमा गाडी थुप्रिएका छन् । 

बजारमा नयाँ गाडीको माग नै नभएपछि आयातकर्ताले भन्सारमा भित्रिएका गाडी समेत छुटाएका छैनन् ।  प्रतीतपत्र (एलसी) खोलेर भित्रिएका गाडीको जाँचपासका लागि राजस्व तिर्ने पैसासमेत नभएको भन्दै आयातकर्ताले गाडी छुटाउन ढिलाई गरेको वीरगञ्ज भन्सारका प्रमुख भन्सार अधिकृत हरिहर पौडेलले बताए । 

एकीकृत जाँच चौकी (आईसीपी) परिसरमा १ हजार ७०० भन्दा बढी नयाँ गाडी रोकिएको नेपाल इन्टरमोडल यातायात विकास बोर्ड (एनआईटीडीबी) वीरगञ्जका प्रमुख कमल ज्ञवालीले जानकारी दिए ।  ‘आईसीपीको ४०० ओटासम्म गाडी पार्किङको क्षमता हो । १ हजार ७०० भन्दा बढी गाडी थुप्रिएपछि व्यवस्थापन नै अस्तव्यस्त बनेको छ’, ज्ञवालीले भने ।  

सरकारले ५० लाख रुपैयाँभन्दा बढी मूल्यका गाडीको आयातमा रोक लगाएको छ । आयातमा कडाई गरिएपछि गत आर्थिक वर्षका पछिल्ला महीनाहरूमा गाडीको आयात यसै पनि घटेको थियो । 

बैंकहरुले गाडीमा कर्जा करीब बन्द नै गरेका छन् । गाडी कर्जा नपाएपछि बजारमा माग आउन नसकेको आयातकर्ता बताउँछन् । सवारी साधन आयात हुने मुख्य नाका वीरगञ्जबाट गत कात्तिकदेखि नै यस्ता सवारी साधनको आयात घटेको देखिन्छ । 

गत आर्थिक वर्ष (आव) २०७८/ ७९ को कात्तिकयता प्रत्येक महीना अघिल्लो आव २०७७/ ७८ को तुलनामा आयात घटेको भन्सारको तथ्यांक भन्सारसँग छ । गत असारमा वीरगञ्ज भन्सारबाट ६८ ओटामात्र जीपकार जाँचपास भएको छ । त्यसअघिको समीक्षा महीनामा यो संख्या ४८७ थियो ।  

सरकारले आर्थिक वर्ष (आव) २०७८/ ७९ को दोस्रो चौमासदेखि नै आयातमा क्रमशः कडाई थालेको थियो । त्यसयता हलुका सवारी साधनको आयात निरन्तर ओरालो लागेका तथ्यांकले देखाउँछ । केही आयातकर्ताले सीमावर्ती भारतीय शहर रक्सौलमा पनि जग्गा भाडामा लिएर गाडी राख्ने गरेका छन् ।

भारतबाट आयात हुने गाडी ३ महीनाभित्र भारतीय भन्सारबाट बाहिरिएको प्रमाण पेश गरेपछि मात्रै त्यहाँको बस्तु तथा सेवा कर (जीएसटी) फिर्ता पाउने प्रावधान छ । भारतमा जीएसटी मिलानका लागि पनि आयातकर्ताले अहिले धमाधम गाडी भित्र्याउनु परेको हो । भन्सारमा आइसकेका गाडी आयातकर्ताले जाँचपास गराएका छैनन् ।

प्रतिक्रिया [0]