दशगजा विवादका कारण पुल निर्माण अलपत्र

अभियान संवाददाता

जनकपुरधाम । नेपाल–भारत सीमावर्ती क्षेत्र धनुषामा निर्माणाधीन पुल दशगजा विवादका कारण वर्षौंदेखि अलपत्र परेको छ । धनुषाको मुखियापट्टी मुसरनिया गाउँपालिकामा पर्ने थलहीघाटमा निर्माणाधीन ५० मिटर लामो पुल करीब ८ वर्षदेखि अलपत्र परेको हो । उक्त पुलको शिलान्यास २०७१ मङ्सिरमा तत्कालीन भौतिक पूर्वाधार तथा यातायात व्यवस्थामन्त्री विमलेन्द्र निधिले गरेका थिए । जनकपुरधामस्थित डिभिजन कार्यालयअन्तर्गत पुल निर्माण शुरू गरिएको थियो । पुल निर्माणस्थल दशगजा क्षेत्रमा पर्ने भन्दै विवाद उत्पन्न भएपछि काम सम्पन्न हुन नसकेको हो । २०७१ साउन १५ मा ४ करोड ७२ लाख ६४ हजार रुपैयाँमा पुल निर्माणका लागि सडक डिभिजन कार्यालय जनकपुर र वज्रगुरु म्याङ्लुङ जेभीबीच सम्झौता भएको थियो । २ वर्षमा पुल निर्माण सम्पन्न गर्ने ठेक्का सम्झौतामा उल्लेख थियो । पुलको फाउण्डेशन र पिलर खडा गरी करीब ५० प्रतिशत काम भइसकेको अवस्थामा भारतीय पक्षले अवरोध गरेपछि निर्माण अघि बढ्न सकेको थिएन ।

प्रतिक्रिया [0]