वीरगञ्ज भन्सारले संकलन गर्‍यो ७६ अर्ब ६३ करोड,लक्ष्यअनुसार राजस्व संकलन हुने सम्भावना न्यून

वीरगञ्ज । वीरगञ्ज भन्सार कार्यालयले चालू आर्थिक वर्ष २०७९/ ८० को छ महीनाको अवधिमा लक्ष्यको ६१ प्रतिशत राजस्व संकलन गरेको छ ।

चालू आवको साउनदेखि पुससम्ममा १ खर्ब २२ अर्ब ७७ करोड १८ लाख रुपैयाँ राजस्व सङ्कलन गर्ने लक्ष्य रहेकामा लक्ष्यको ६१ दशमलव २७ प्रतिशत अर्थात् ७६ अर्ब ६३ करोड ४ लाख  रुपैयाँ राजस्व संकलन भएको भन्सार कार्यालयका सूचना अधिकृत रामचन्द्र ढकालले जानकारी दिए।     
     
उनका अनुसार सो भन्सार कार्यालयको चालू आवमा २ खर्ब ६१ अर्ब ९९ करोड रुपैयाँ राजस्व संकलन गर्ने लक्ष्य छ । हालसम्म वार्षिक लक्ष्यको ५१ प्रतिशत राजस्व संकलन भएको सूचना अधिकृत ढकालले बताए । सो भन्सार कार्यालयले गत आव २०७८/ ७९ मा लक्ष्यको ९३ प्रतिशत र आव २०७७/ ७८ मा लक्ष्यको ९७ प्रतिशत राजस्व संकलन गरेको थियो ।

चालू आवमा पनि लक्ष्यअनुसार राजस्व संकलन हुने सम्भावना कम रहेको सूचना अधिकृत ढकालको भनाइ छ । समग्रमा आयात घट्नु, राजस्वमा बढी योगदान गर्ने वस्तुको आयातमा प्रतिबन्ध तथा ‘एलसी‘ खोल्नमा कडाइ गरिएकाले पनि राजस्व सङ्कलन घटेको सूचना अधिकृत ढकालले बताए।

सरकारले मदिरा, मोबाइल, गाडीको आयात खुला गरे पनि आयातकर्ताले एलसी खोलेर आयात गर्न अझै समय लाग्ने भएकाले आगामी दुई महीना यस्तै अवस्था हुने उनको भनाइ छ । रासस

प्रतिक्रिया [0]