सोलार लिफ्ट सिँचाइ योजनाको काम सम्पन्न

तनहुँ । जिल्लाको शुक्लागण्डकी र भीमाद नगरपालिकामा सोलार लिफ्ट सिँचाइ योजना सम्पन्न भएको छ । शुक्लागण्डकी–१० को लोकेतीटार र भीमाद–७ को सिस्नेरी ठूलो फाँटमा सोलारका माध्यमबाट पानी लिफ्ट गरी सिँचाइको व्यवस्था गरिएको हो । योजना निर्माण सम्पन्न गरी सञ्चालनका लागि उपभोक्तालाई हस्तान्तरण गरिएको जलस्रोत सिँचाइ विकास डिभिजन कार्यालयका डिभिजन प्रमुख रमेशराज शर्माले जानकारी दिए । उनका अनुसार गण्डकी प्रदेश सरकारको सहयोगमा लोकेतीटारमा रू. १ करोड २९ लाख र सिस्नेरीमा रू. ७९ लाखको लागतमा योजना निर्माण सम्पन्न भएको हो ।

लोकेतीटारमा २३ र सिस्नेरीमा २७ धारा निर्माण गरी सिँचाइको व्यवस्था मिलाइएको निर्माण कम्पनी अकलादेवी कन्स्ट्रक्सन एण्ड कन्सल्टटेन्सी प्रालिका प्रतिनिधि सुजन सुवेदीले बताए । उनका अनुसार उक्त दुुई स्थानमा गरी करीब ८०० रोपनी क्षेत्रफलमा सिँचाइ गरिनेछ । सिँचाइ योजनाबाट शुक्लागण्डकीमा ३०० र भीमादका २०० बासिन्दा लाभान्वित हुनेछन् । यहाँका बासिन्दालाई उत्पादनमा आत्मनिर्भर बनाउने उद्देश्यले सिँचाइ योजनाका लागि प्रदेश सरकारले बजेट विनियोजन गरेको हो ।

योजनाको निर्माण सम्पन्न भएर उपभोक्तालाई हस्तान्तरण गरिए पनि कार्यालयबाट जाँच गरी बाँकी रकम भुक्तानी गरिने जलस्रोत सिँचाइ विकास डिभिजन कार्यालयका प्रमुख शर्माले बताए । उनका अनुसार सतहमा पानी भएका स्थानमा कुलो र नहरबाट सतहमा पानी नभएका स्थानमा सोलार लिफ्टमार्फत सिँचाइको व्यवस्था मिलाइएको छ ।

स्थानीय क्याङ्दी खोलामा सम्पवेल निर्माण गरी ७० मिटर उचाइमा लिफ्टमार्फत दुई वटा ट्यांकीमा पानी संकलन गरी लोकेतीटारमा सिँचाइको योजना सम्पन्न गरिएको छ । उक्त क्षेत्रमा करीब चार किमि पाइप बिच्छ्याएर प्लट–प्लटमा पानीको धारा जडान गरी सूचारु गरिएको जलस्रोत सिँचाइ विकास डिभिजन कार्यालयले जानकारी दिएको छ ।

सिस्नेरीफाँटमा जमिनभन्दा ७० मिटर गहिराइमा खनिएको बोरिङबाट पानी लिफ्ट गरी एउटा ट्यांकीमा संकलन गरेर सिँचाइको व्यवस्था मिलाइएको छ । उक्त योजनाअन्तर्गत तीन किलोमिटर पाइप बिच्छ्याइएको छ । रासस

प्रतिक्रिया [0]