प्रदेश–१ को राजधानी विराटनगर नै राख्ने सहमति, नाम तत्काललाई थाँती

रोशनी भट्टराई

वैशाख २१, विराटनगर । प्रदेश–१ को राजधानी र नाम तय गर्न विराटनगरमा बसेको नेकपाको बैठकले प्रदेश–१ को राजधानी विराटनगर राख्ने तय गरेको छ । नाम भने अर्को अधिवेशनले टुंगो लगाउने सहमति जुटेको छ । राजधानी बृहत विराट क्षेत्रको विराटनगरमा हुनेछ । राजधानीको संरचना विराटनगर, इटहरी र गोठगाउँमा रहने तय गरिएको छ भने राजधानीको संरचनामा कार्यपालिका र व्यवस्थापिका रहनेछ ।

बैठकपछि नेपाल कम्युनिष्ट पार्टीका प्रदेश–१ का ईन्चाज भिम आचार्यले पार्टी भित्रका अधिकांश सांसदको भावनालाई सम्बोधन गर्नका लागि विराटनगरलाई राजधानी तोकेर संरचना बृहत विराट क्षेत्र भित्र निर्माण गरिने जानकारी दिए । अधिकांश सांसदको मागलाई ध्यानमा राखेर गोठगाउँ, इटहरी, विराटनगरको नजिकैको दूरीलाई आधार बनाएर संरचना निर्माण हुने इन्चार्ज आचार्यको भनाइ छ ।

तीन दिनदेखि प्रदेश–१ संसदमा सहभागी दलका प्रतिनिधि र विभिन्न क्षेत्रको प्रतिनिधित्व गर्ने नेकपा सांसदसँगको रायका आधारमा अन्तिम निर्णय लिइएको हो । नामका बारेमा भने पुनः विस्तृत छलफल गरेर सबैलाई मान्य हुने निर्णय आउने बताइएको छ ।

मुख्यमन्त्री शेरधन राईले बृहत विराटनगर भित्र प्रदेशको राजधानी तोक्ने निर्णय भएको जानकारी दिए । इटहरी, विराटनगर र गोठगाउँलाई समेटेर स्याटेलाईटसिटी निर्माण गरिने र त्यही भित्र भौतिक संरचना निर्माण गरेर राजधानी स्थापना हुने मुख्यमन्त्री राईले बताए । उनले संरचना निर्माण नहुँदासम्म विराटनगरका हालकै संरचनाबाट काम हुने जानकारी दिए । मुख्यमन्त्री राईले विराटनगरलाई अहिले तत्काल राजधानी तोकेर ती संरचना निर्माण भएपछि राजधानी त्यो ठाउँमा जाने स्पष्ट पारे । आइतवार बस्ने संसदीय दलको बैठकपछि निर्णय सार्वजनिक हुने मुख्यमन्त्रीले बताए । सबैलाई समेटेर लैजानका लागि आइतवारसम्म सबै दलहरुसँग छलफल गरेर प्रस्ताव लैजाने उनले बताए ।

यता प्रदेश सरकारका आन्तरिक मामिला तथा कानून मन्त्री हिक्मतकुमार कार्कीले भने प्रतिपक्षीसँगको छलफलपछि मात्र कसरी अगाडि बढ्ने भन्ने बिषय टुंगीने बताए । प्रदेशसभाले आइतवारसम्म प्रदेशको राजधानी र नामका विषयमा प्रस्तावको आहन गरेको छ । यसअघि बिहीवारसम्मको समय दिइएकोमा दलहरुबीच आवश्यक छलफल गर्नुपर्ने भन्दै समय थप गर्न प्रदेश सभामुखलाई आग्रह गरिएको थियो । नेकपा संसदीय दलको बैठक भने आइतवार १ बजेलाई बोलाइएको छ ।

प्रतिक्रिया [0]