स्थानीयबासीले अवरोध गर्दा विद्युत प्रशारण लाईन विस्तार अबरुद्ध

रोशनी भट्टराई

वैशाख ३०, विराटनगर । मोरङको ग्रामथानस्थित् गिदनीय टोलमा स्थानीयबासीको विरोधका कारण दुहबी–कटहरी खण्डको ३३ केभी प्रसारणको हाइटेन्सन लाईनको विस्तार कार्य अबरुद्ध भएको छ । स्थानीयले सुरक्षा लगायतका कारण देखाउँदै प्रशारण लाईनको विस्तार कार्य रोकेका हुन् ।

उक्त प्रसारण लाईन विस्तारमा अवरोध सिर्जना हुँदा कटहरी– रंगेली कोरिडोरका उद्योगले भोग्दै आएको विद्युत आपूर्तिको समस्या तत्काललाई यथावत रहने भएको छ । उक्त औद्योगिक कोरिडरमा हाल आपूर्ति भईरहेको विद्युत पर्याप्त नभएपछि कटहरीमै सबस्टेशन निर्माण गरी दुहबी सबस्टेशनबाट ३३ केभी प्रसारणको हाइटेन्सन लाईनमार्फत् विद्युत आपूर्ति गर्न लागिएको छ ।

त्यसका लागि कटहरीमा विश्व बैंकको सहयोगमा सबस्टेशन निर्माण समेत भइसकेको छ । दुहबी र कटहरी क्षेत्रको २६ किलोमिटर क्षेत्रमा सबै टावरहरुसमेत निर्माण गरी गिदनीयस्थित् दुई किलोमिटर क्षेत्र बाहेक सबै ठाउँमा लाईन बिस्तार गर्ने काम समेत भइसकेको छ । अहिले कटहरी क्षेत्रमा टंकीसिनवरी र विराटनगरको रानी सबस्टेशनबाट ११ केभी प्रसारण लाईनबाट बिद्युत आपूर्ति गरिँदै आएको छ ।

उक्त क्षेत्रमा साना ठूला गरी १००को संख्यामा उद्योगहरु रहेका छन् । उद्योग तथा घरेलु प्रयोगकर्ताबाट बिद्युतको माग बढ्न थालेपछि उक्त क्षेत्रमा बिद्युतको ओभरलोड भइरहेको प्राधिकरणको क्षेत्रीय कार्यालय विराटनगरका प्रमुख सचिदानन्दन यादबले बताए ।

  ‘दुहबी– कटहरीको ३३ केभी प्रसारण लाईन सञ्चालनमा आउना साथ कटहरी– रंगेली कोरिडोरमा देखिएको बिद्युत आपूर्तिको समस्या हल हुन्छ’, उनले भने, ‘उद्योगीको माग सम्बोधन गर्न नै प्राधिकरणले प्रसारणलाईन विस्तार गर्न लागेको हो । ’

प्रतिक्रिया [0]