धार्मिकस्थल विष्णुपादुका जोड्न सर्दुमा पुल

नरहरि आचार्य

जेठ २६, धरान(अस) । वर्षौंदेखि वर्षामा बजारसँग सम्बन्ध विच्छेद नै गराउने धरान जोड्ने सर्दु खोलामा २५० मिटर लम्बाईको पुलको निर्माण कार्यले तिब्रता पाएको छ । धरान ११ मंगलबारे पश्चिममा रहेको सर्दुखोलामा रू. ८ करोडको लागतमा पुल निर्माण कार्य तिब्र गतिमा रहेको छ ।

११ मिटर चौडाईको पुल आउँदो असार महीना सम्ममा सम्पन्न हुने गरि निर्माण कार्य अघि बढेको छ । पुल बन्न थाले पछि धरानको बजारसँग जोडिने बराहक्षेत्र, उदयपुर, रामधुनी नगरपालिकावासीलाई राहत पुग्ने छ । बन्धु कन्ट्रक्सनले धमाधम काम गरिरहेको कम्पनीका पर्शुराम चापागाईंले जानकारी दिए ।

यो पुल अर्को असार मसान्तसम्ममा निर्माण कार्य सकिने उनको भनाइ छ । तर निर्माणका लागि अहिले बाढी आउने क्रम रहेकोले काममा केही अवरोध पुगेको उनको भनाइ छ । उनले भने, ‘यसपालि पनि अलि छिटो हुने थियो, अस्ति दुई तीनपटक आएको बाढीले गर्दा काममा अवरोध भयो, काम दोहोर्‍याएर गर्नुपर्ने भयो तर पनि गति लिएकै छ ।’

साविक विष्णुपादुका गाविस धरान उपमहानगरपालिकामा गाभिए पछि धरानको वडा नम्बर २० बनेको छ । सर्दु खोलामा पुल नहुँदा वर्षामा आउने बाढीका कारण त्यहाँका जनताले दुःख पाउँदै आएका थिए । विष्णुपादुका जस्ता प्रसिद्ध धार्मिकस्थल जानलाई खोलाले निक्कै सास्ती दिने गरेको थियो । वर्षा लाग्यो कि सर्दु तर्न सर्वसाधारणका लागि जोखिम नै थियो ।

जोखिमपुर्ण यात्रा गर्न बाध्य हुँदै उनीहरू वर्षामा उत्पादन भएका कृषि उत्पादन बजारसम्म ल्याउन हम्मे पर्ने गरेको विष्णुपादुकाका कृषक हेमकर्ण राईको भनाई छ । उनले भने, ‘खासगरी चल्तीको धरान–विष्णुपादुका सडकखण्डमा पर्ने सर्दु खोलामा पुल नहुँदा सर्वसाधारणहरुले धेरै सास्ती भोग्नु परिरहेको थियो तर अहिले पुल बन्ने भएपछि खुशी छौं ।’

प्रतिक्रिया [0]