विराटनगरका ३४ चोकलाई वाइफाई जोन बनाइने

नरहरि आचार्य

३२ जेठ,विराटनगर (अस)। विराटनगर महानगरपालिकाका ३४ ओटा चोकलाई वाइफाई जोन बनाइने भएको छ । विराटनगर महानगरका मेयर भीम पराजुलीले आगामी आर्थिक वर्षको योजनाबाट महानगरका विभिन्न ३४ ओटा चोकलाई वाइफाई जोन बनाइने बताएका हुन् ।

विराटनगरको उत्तरी क्षेत्रमा रहेको पुष्पलालचोकबासीले स्थानीय चोकलाई हरियाली बनाउने अभियानको शुरुवागत गर्दै मेयर पराजुलीले यस्तो जानकारी दिएका हुन् । उनले विराटनगरलाई स्वच्छ र हराभरा बनाउन महानगरपालिकाले विभिन्न कार्यक्रमहरु संचालन गरिरहेको पनि जानकारी दिए ।

चौतर्फी एकसाथ भइरहेको विकास निर्माणका कारण धुलाम्मे बनेको विराटनगरमा हरियाली बनाउने अभियान शुरु गरेका पुष्पलालचोकवासीले आपनो चोकलाई हराभरा, स्वच्छ र सुन्दर बनाउन वृक्षारोपण अभियानसमेत शुरु गरेका छन् । बृक्षारोपणसँगै सरसफाईका साथ पुस्पलालचोकस्थित संरचनालाई रंगरोगन गरेर आकर्षक बनाइएको छ ।

स्थानीयले शनिवार बिभिन्न प्रजातिका ३६ ओटा रुखबिरुवा रोपेर अभियानको शुरु गरेका थिए । सो क्रममा चोकको तीनतर्फ समीको विरुवा रोपिएको छ भने सडककोबीचमा रहेका डिभाइडरमा अशोक र विभिन्न प्रजातिका फूलका बिरुवा रोपिएका छन् ।

चोकलाई स्वच्छ र हराभरा बनाउन स्थानीय युवाहरु लागि परेको परिवर्तनकालागि हातेमालोका अध्यक्ष विनोद चहरले जानकारी दिए ।परिवर्तनका लागि हातेमालोले विराटनगरमा लामो समयदेखि सरसफाई लगायत सचेतनाका लागि भित्ते चित्र लेखन अभियान गर्दै आएको छ ।

प्रतिक्रिया [0]