८० प्रतिशत पूँजीगत खर्च गर्ने प्रदेश–१ सरकारको दाबी

रोशनी भट्टराई

असार २, विराटनगर । चालू आर्थिक वर्षभन्दा रू. ७ अर्ब बढीको बजेट सार्वजनिक गरेको प्रदेश–१ सरकारले आगामी वर्ष ८० प्रतिशत भन्दाबढी पूँजीगत खर्च गर्ने आर्थिक मामिला तथा योजनामन्त्री इन्द्रबहादुर आङ्बोले बताएका छन् । मन्त्रालयले सोमवार विराटनगरमा आयोजना गरेको पत्रकार भेटघाट कार्यक्रममा मन्त्री आङ्बोले आर्थिक वर्षको प्रारम्भदेखि नै बजेट खर्च शुरु हुने बताए ।

प्रदेश सरकारसँग बजेट कार्यान्वयनका लागि न्यूनतम कार्यालयहरु र थोरै भएपनि कर्मचारीको टिम रहेकोले बजेट कार्यान्वयन अगाडि बढाउन समस्या नरहेको उनले बताए । चालू आर्थिक वर्षमा पूँजीगत बजेट अपेक्षा गरेभन्दा कम खर्च हुँदा प्रदेश सरकारसँग झण्डै रू. ६ अर्ब नगद मौज्दात रहेको थियो । त्यसलाई आगामी वर्षको योजनामा समायोजन गरिएको छ । आर्थिक मामिला तथा योजनामन्त्रीले चालू वर्षको झण्डै आधा समय बजेट खर्च हुन नसक्ने अवस्था रहँदा पनि अन्तिमसम्ममा ५० प्रतिशतभन्दा बढी पूँजीगत खर्च हुने जिकिर गरे ।

प्रदेश सरकारले आगामी आर्थिक वर्षका लागि पूर्वाधार विकास तर्फ रू. २० अर्ब हाराहारीमा बजेट विनियोजन गरेको छ । पूर्वाधार विकासले उत्पादन, रोजगार, आर्थिक समृद्धिको आधार तयार पार्ने सरकारको विश्वास छ । प्रदेश योजना आयोगले विकास र समृद्धिको राष्ट्रिय लक्ष्य हासिल गर्न आगामी वर्ष रू. ५५ अर्ब बजेट आवश्यक पर्ने बताएको थियो । आन्तरिक स्रोतको न्यूनता र योजना कार्यान्वयनका लागि आवश्यक संयन्त्रको पूर्णता नहुँदा सरकारले क्षमतामा आधारित भएर मात्र बजेट ल्याएको मन्त्री आङ्बोले बताए ।

प्रदेश सरकारले आगामी आर्थिक वर्षका लागि रू. ४२ अर्ब २० करोड ४ लाख १२ हजारकोे बजेट ल्याएको छ । चालू खर्चतर्फ रू. १८ अर्ब २० करोड ४ लाख १२ हजार र पूँजीगततर्फ रू. २३ अर्ब ५७ करोड ३९ लाख ३४ हजार विनियोजन गरेको छ । अन्तर सरकारी हस्तान्तरणका लागि रू. ९९ करोड ९९ लाख ९८ हजार छुट्याइएको छ । बजेटको स्रोतमध्ये आन्तरिक राजस्व रू. ३ अर्ब ८६ करोड उठाउने लक्ष्य छ भने राजस्व बाँडफाँटबाट प्राप्त हुने रू. १० अर्ब ५२ करोड, अनुदानबाट रू. २१ अर्ब २१ करोड व्यहोरिनेछ । चालू आर्थिक वर्षको खर्च हुन नसकेको बजेट रू. ६ अर्ब ६१ करोड रहने पूर्वानुमान छ । चालू आर्थिक वर्ष सकिन १ महिनामात्र बाँकी रहँदा प्रदेश–१ को बजेट खर्च २९.४० प्रतिशत मात्र भएको छ । चालू आवका लागि प्रदेश सरकारले रू. ३५ अर्ब ९३ करोड ६० लाख रुपैयाँ बजेट विनियोजन गरेकोमा जेठसम्ममा जम्मा रू. १० अर्ब ५१ करोड रुपैयाँ मात्रै बजेट खर्च भएको छ ।

प्रदेश लेखा नियन्त्रण कार्यालयका अनुसार पूँजीगततर्फ रू. ५ अर्ब १६ करोड ९३ लाख र चालूतर्फ रू. ५ अर्ब ४३ करोड ९१ लाख खर्च भएको छ । प्रदेश सरकारले चालूतर्फ ३०.७ प्रतिशत बजेट खर्च गरेको छ भने पूँजीगततर्फ २८.७५ प्रतिशत मात्र खर्च गरेको छ । सबैभन्दा धेरै बजेट विनियोजन गरिएको भौतिक पूर्वाधारमा १९.५३ प्रतिशत खर्च भएको छ । चालू आर्थिक वर्षमा प्रदेश सरकारले कम्तिमा ६० प्रतिशत पूँजिगत खर्च गर्ने लक्ष्य राखेको थियो ।

प्रतिक्रिया [0]