क्षमता भन्दा तेब्बर यात्रु राख्न थालेपछि यात्रा कष्टकर

नरहरि आचार्य

असार २, डोल्पा (अस) । एक दशक अगाडी डोल्पाबाट नेपालगन्ज, सुर्खेतमा गई पिठ्यूयमा नुन र खाद्यान्न बोकेर दुई महीना पछि घर पुग्ने दिन त अव पुरानो भइसक्यो । त्यो दिन गएता पनि डोल्पाबासीले यातायातका साधनको हकमा भने त्यस्तै समस्या बेहोर्दै आएका छन् ।

एक त थोत्रा जिप त्यसमाथि मनोमानी भाडा, अनि क्षमता भन्दा तेब्बर यात्रु यहाँका जिप व्यवसायीको दैनिकी नै भएको छ । यसरी जिप चलाउन थालेपछि यस क्षेत्र भएर आवत जावत गर्ने यात्रुहरुको यात्रा जोखिमपूर्ण त छ नै यसतर्फ अहिलेसम्म कुनै सरोकारवाला निकायको ध्यान नजानू विडम्वनापूर्ण छ । ठाउँमा–ठाउँमा प्रहरीको चेक पोष्ट नहुँदा यातायात व्यवसायीले यात्रुलाई भेडा बाख्रा हुले झैं गर्दा यात्रा कष्टकर भएको स्थानीय मुड्केचुला गाउँपालिका– ६ शुरका रविन्द्र सिंहले बताए ।

डोल्पामा सञ्चालनमा रहेका यस्ता यातायात व्यवसायीले दत्र्ता नगरी सवारी साधनहरु चलाएको पाइएको छ ।  जाजरकोट सदरमुकाम देखि डोल्पाको दुनै सम्म सञ्चालनमा रहेका सवै सवारी साधनमा यात्रीलाई सेवा भन्दा सास्ती दिने गरेको यात्रुहरुको गुनासो छ । सडकको बीच बीचमा पुल , पुलेशा नहुँदा आधा दर्जन ठाउँमा झर्ने र गाडीमा चढ्दा अर्को सास्ती त छँदैछ ।

यातायात व्यवसायीको सिण्डिकेटका कारण यात्रुहरु जोखिम मोलेर यात्रा गर्न बाध्य छन् । प्रहरी चौकी भएको ठाउँमा १०० मिटर अगाडी यात्रुलाई झारेर हिंड्न लगाई पुनः सवारीमा चढाएर यात्रा गर्न वाध्य पार्ने गरिएको छ । धुलाम्य कच्ची सडकका कारण एक ठाउँबाट अर्को ठाउँमा जाँदा मानिस नै नचिनिने गरी पुग्ने गरेको अर्का ठुलिभेरी नगरपालिका–५ का रामबहादुर रोकायले बताए ।

११८ किलोमिटर यात्रा गर्दा रू.२ हजार ५०० भाडा तिरेर पनि सजिलोसँग यात्रा गर्न नपाएको यात्रुको गुनासो छ । यहाँका जिपको अगाडीको तीन सिटमा चार जना यात्रु राख्ने गरिन्छ भने चालक रहने सिटमा चार जना राख्ने गरिएको भुक्तभोगीहरु बताउँछन् । त्यसपछि जिपको छतमा कम्तिमा पनि पाँच जना भन्दा बढी राख्ने गरिएको छ । उता जिल्ला प्रहरी कार्यालय जाजरकोट र डोल्पाले जथाभावी यात्रु बोक्न कडाई गरेता पनि कार्यान्वयन भएको देखिदैन ।

यस सडक खण्डमा छ ओटा भन्दा बढि पुल निर्माण हुन बाँकी छन् । नलगाड नदी, खोलेखेत, साप्नेखेत, खमाउरेखोला, वडाखोला, त्रात्रगाड, ताँसुगाड, तल्लु स्थित भेरी नदी, डोल्पाको खदाङ, त्रिपुराकोट, छलगाड, रुपगाड लगायतका ठाउँमा पुल निर्माण कार्य शुरु नै भएको छैन । सरकारले यो वर्ष सडक दुनै सम्म पुर्याउने भनेर उद्घोष गरेपनि पुल निर्माण नभई डोल्पामा सहज रुपमा यात्रा गर्न पाउने सम्भावना देखिएको छैन ।

गैरकानुनी तवरले सञ्चालन भएका जिपहरु दर्ता प्रक्रियामा ल्याएर सञ्चालन गर्ने हो भने मात्रै यात्रुमैत्री यातायात हुने देखिन्छ ।  नत्र नेपाली सेनाले निर्माण कार्य जारी राखेको यस सडक खण्डको स्तरोन्नती र पुल निर्माण नहुँदा सम्म यहाँका नागरिकले यात्रामा दुःख पाईरहने अवस्था रहेको छ ।

प्रतिक्रिया [0]