बजेटमाथिको छलफलमा मुख्यमन्त्री नआएपछि कांग्रेसले गर्‍यो संसद बैठक अवरुद्ध

आकाश तारा बयक

असार ८, सुर्खेत । प्रमुख प्रतिक्षी दल नेपाली कांग्रेसले कर्णाली प्रदेश सभा बैठक अवरुद्ध गरेको छ । बजेटमाथिको छलफलमा मुख्यमन्त्री महेन्द्रबहादुर शाही नआएपछि कांग्रेसले आइतवारको प्रदेश सभा बैठक अवरुद्ध गरेको हो । आर्थिक वर्ष २०७६/०७७ को बजेटमाथिको महत्वपूर्ण छलफलमा मुख्यमन्त्री शाही अनुपस्थित भएपछि बैठक अबरुद्ध गरिएको प्रमुख प्रतिपक्षी दलका नेता जीवनबहादुर शाहीले जानकारी दिए ।

उनले बजेटमाथिको छलफलमा मुख्यमन्त्री नआउँदासम्म बैठक सुचारु हुन नदिने बताए । ‘बजेटजस्तो संवेदनशील विषयमा छलफल गर्दा मुख्यमन्त्री उपस्थित नहुनु गम्भीर विषय हो,’ उनले भने, ‘मुख्यमन्त्री छलफलमा नआउँदासम्म बैठक सुचारु हुन दिदैनौं ।’ उनले निष्ठा, सत्यता र संसदीय मर्यादाका लागि संसद अवरोध गरेको जिकिर गरे ।

उनका अनुसार असार १ गते प्रस्तुत भएको बजेटमाथि शुक्रवारदेखि छलफल गर्ने भनिए पनि बिनाकारण बैठक स्थगित गरिएको थियो । आइतवार कांग्रेसको अवरोधपछि कर्णाली प्रदेश सभाका सभामुख राजबहादुर शाहीले असार ११ गते ३ बजेसम्मका लागि बैठक स्थगित गरिएको जानकारी दिए ।

प्रतिक्रिया [0]