वादी समुदायको सामुहिक मादल उद्योग, प्रतिव्यक्ति मासिक २० हजार आम्दानी    

प्रवीर ददेल

कात्तिक २७, रुकुम । वालीघरे प्रथा छाडेर यहाँका वादी समुदायका युवाहरुले सामुहिक रुपमा मादल उद्योग सञ्चालन गरेका छन् ।वालीघरे प्रथाबाट जीविकोपार्जनमा समस्या भएपछि वादीहरु मिलेर त्रिवेणी गाउँपालिका २ सिम्रुतु बजारमा आधुनिक मादल उद्योग सञ्चालन गरिएको छ ।

त्रिबेणी वादी मादल उद्योगमार्फत आधुनिक प्रविधिबाटट मादल उत्पादन गर्न शुरु गरिएपछि वादी परिवारहरुको आर्थिक  अवस्थमा  समेत सुधार हुँदै गएको छ ।सात जना युवाहरु मिलेर मादल उद्योग संचालनमा ल्याएको संचालक बुद्धिमान वादीले बताए । उनले उद्योगबाट दैनिक पाँच ओटासम्म मादल  बन्ने गरेको बताए । 

व्यक्तिगत रुपमा मादल उत्पादन गर्दा वादीहरुले ज्याला बापत अन्न लिने गरेका थिए । अहिले व्यावसायिक रुपमा मादल उद्योग संचालन गर्दा नगद कारोबार भएकाले फाईदा  भएको अर्का संचालक गोपाल बादीले बताए । 

यहाँ बनेका मादल दाङ, नेपालगञ्ज तथा काठमाडौंसम्म पुग्ने गरेको छ । स्थानीय बजारमा पनि मादलको माग बढ्दै गएको उनको भनाइ छ । बिभिन्न स्थानहरुबाट छाला र काठ खरीद गरी मादल बनाउने गरिएको छ । 

‘बजारको समस्या नभएकाले उद्योग फस्टाउन थालेको छ,’ उनले भने, ‘जिल्लाका बिभिन्न स्थानका साथै जिल्ला बाहिरबाट पनि माग बढेको छ ।’ उक्त  उद्योगलाई रुपान्तरण नेपाल र रुकुमेली समाज विकास केन्द्रले आर्थिक सहयोग गरेका छन् । उनीहरुले उद्योगकै रुपमा दर्ता गरी मादल उद्योग संचालन गरेको बताए ।  

‘पहिले पहिले बालीप्रथामा काम गर्दा जीविकोपार्जनमा समस्या हुने गरेको थियो,’ गोपाल बादीले भने, ‘अहिले प्रतिव्यक्ति मासिक रू.२० हजारसम्म  आम्दानी हुने गरेको छ ।’ 
उद्योगमा सातैजनाले दिनभर मादल बनाउने गर्छन् ।  उनले क्रमशः लगानी वृद्धि गर्दै लगिने पनि बताए ।

‘केहि समयपछि सुल्पा र माटाका अन्य भाडाकुडाको उत्पादन थाल्ने योजनामा छौ,’ उनले भने, ‘कमाई राम्रो हुन थालेपछि बचतसमेत शुुरु गरेका छौ ।’ पुर्खाहरुले गर्दै आएको परम्परालाई आधुनिकिकरण गरेकाले फाईदा पनि राम्रो  भएको उनीहरुको भनाइ छ ।

 मादल हाल बजारमा प्रतिगोटा रू.१ हजार ५००मा विक्री हुने  गरेको  छ ।
 

प्रतिक्रिया [0]