चैत १८, विराटनगर। लकडाउनको एक सातामा विराटनगर भन्सार नाकाबाट २ हजार २५८ मेट्रिक टन खाद्यान्न भित्रिएको छ ।
त्यस्तै सो अवधिमा १४२ टन हरियो तरकारी र १११ टन फलफूल भित्रिएको छ । लकडाउन र नाका बन्दको कारण खाद्यान्न अभाव हुने त्रास स्थानीयमा रहेपनि भन्सारबाट सहज रुपमानै खाद्यान्न लगायतका तरकारी तथा फलफूलको आयात भइरहेको छ ।
सरकारले पहिलो चरणको लकडाउन घोषणा गरेपछि खाद्यान्नको अभाव हुनेभन्दै सर्वसाधरणले आवश्यकताभन्दा बढी सामानको जोहो गरेका थिए । जस्को कारण बजारमा सामग्रीको अभाव सृजना भएको थियो ।
तर लकडाउनको अवधिभर खाद्यान्नको ढुवानी भारतबाट भइरहेकाले बजारमा आपूर्ति व्यवस्था पहिलेकोभन्दा सहज हुदै गएको छ । तर कालोबजारी गर्नेहरुले भने सामान लुकाएको कारण केही समय कृतिम अभाव श्रृजना भएको थियो ।
विराटनगर महानगर र जिल्ला प्रशासन कार्यालय लगायतका सम्बद्ध कार्यालयहरुको अनुगमनको कारण बजारमा आपूर्ति बिस्तारै सहज भएको बाणिज्य, आपूर्ति तथा उपभोक्ता संरक्षण कार्यालय प्रमुख हिमालय बरालले बताए ।
खाद्यान्न लगायतका बस्तुमा अहिले बजारमा कुनै समस्या छैन । तर लक डाउन लम्बिदै गएमा ग्यासको अभाव श्रृजना हुनसक्छ । उनलेभने‘पसल खुलाउने र कालोबजारी अनुगमन गर्ने काम गरिरहेका छौं ।’ खाद्यान्नको कृतिम अभाव सृजना हुन नदिन आफुहरुले अनलाइन मार्फत पनि उजुरी लिने गरेको उनले बताए ।
उनले सोमवारदेखि अनलाईन सपिङका लागि गुदरी डटकम, भाटभटेनी सुपरमार्केट र आरके मललाई अनुमति दिएको बताए । अब घरमा नै बसेर अनलाईन मार्फत खाद्यान्न, तरकारी तथा फलफूलको अर्डर गर्न सकिने र त्यो निशुल्क डेलिभरि हुनेछ ।
विराटनगर भन्सार कार्यालयका प्रवक्ता गोपी उप्रेतीका अनुसार सोमबार पनि भन्सार कार्यालयबाट एक ट्रक मकै, एक कन्टेनर हरियो मटर, ४ ट्रक आलु, १÷१ ट्रक प्याज र चामल भित्रिएको छ ।
गत सोमवार विराटनगर भन्सार कार्यालयले रू.१ करोड २८ लाख राजस्व संकलन गरेको छ । लकडाउनको समयमा पनि तेश्रो मुलुक र भारतबाट आउने सामग्रीहरु आइरहेको तर भारतमा पनि लकडाउनको भएकाले त्यसको असर यो साताबाट पर्न सक्ने उनले बताए ।
केही खाद्यान्न र हरियो तरकारी भने बिहारबाट नै आउने भएकाले त्यसमा समस्या नरहेको उनले जनाए ।