वैशाख ४, विराटनगर । कोरोना भाइरसको जोखिम बढ्दै गएपछि पर्नसक्ने आर्थिक भारलाई ध्यानमा राख्दै प्रदेश नं १ सरकारले विभिन्न १० ओटा शीर्षकमा रहेको रू.५ अर्ब बजेट खर्च गर्न बुधवारदेखि रोक लगाएको छ ।
आर्थिक मामिला तथा योजनामन्त्री इन्द्रबहादुर आङ्बोले भ्रमण, अध्ययन भ्रमण, अनुगमन, सेवा परामर्श, कम्प्यूटर, सवारीसाधन र फर्निचरलगायतका शिर्षकमा छुट्याएको बजेट खर्च गर्न रोक लगाएका हुन् । चालू आवको बजेटमा ती शिर्षकमा करीब रू.५ अर्ब बजेट बिनियोजन गरिएको थियो ।
हालसम्म केही रकम खर्च भएपनि अब कुनै खर्च गर्न नपाउने गरि बजेटलाई संचित गरिएको छ ।
कोरोना भाइरसको जोखिम नियन्त्रण नभइरहेको बेला सरकारले ती बजेट खर्च गर्न रोक लगाएको हो । प्रदेश सरकारसँग अहिले कोरोना भाइरसको संक्रमणबाट बच्नको लागि बजेटको समस्या नरहेकोले आत्तिनुपर्ने अवस्था नरहेको मन्त्री आङ्बोले बताए ।
कतिपयले सांसद विकास कोषको रकम कोरोना भाइरसको कोषमा खर्च गर्नुपर्ने भनेर आवाज उठाए पनि त्यो सान्दर्भिक नरहेको उनले बताए । ‘हामीले ९ महीना अघिदेखि नै काम अघि बढाईसकेका छौं, अब केही काममात्रै बा“की छ’ उनले भने, ‘त्यसैले यो सान्दर्भिक छैन ।’
भारतमा दुई महीनाअघि मात्रै बजेट आएको र त्यो कार्यान्वयन हुन लागेको अवस्थामा रहेकाले भारतमा जसरी नै नेपालको बजेट परिचालन हुनुपर्छ भन्ने तर्क जायज नभएको मन्त्री आङ्बोको भनाइ छ ।
‘हामीले नौ महीना कटिसकेका छौ, उनीहरु दुई महीनामा छन, त्यसैले भारतसँग तुलना गरेर सरकारलाई अनावश्यक रुपमा गाली गर्न हँुदैन,’ उनले भने ‘हामी हाम्रो धरातलमा रहेर काम गर्नुपर्छ ।’