धरानको विष्णुपादुकामा सामूहिक बेसार खेती

१५ बिगाहाबाट ५० टन बेसार उत्पादन गर्ने लक्ष्य

दिनेश गजमेर

धरान । बेसार जोन घोषणा भएको सुनसरीको धरान उपमहानगरपालिका–२० का किसानहरूले सामूहिक रूपमा बेसार खेतीको शुरूआत गरेका छन् । राज्यले नै धरान उपमहानगरपालिकाको उक्त वडालाई कृषि क्षेत्र घोषणा गर्दै बेसार जोनको रूपमा विकाश गर्ने अवधारणा अघि सारेको थियो ।

वडाको विष्णुपादुकास्थित माछामारामा रहेको प्रगति बेसार उत्पादन किसान समूहले पहिलोपटक सामूहिक बेसार खेतीको शुरूआत गरेका हुन् । समूहमा आवद्ध स्थानीय १९ घरपरिवारले १५ बिगाहा जमीनमा सामूहिक खेती गरेका छन् । समूहले वार्षिक ५० टन बेसार उत्पादनको लक्ष्य राखेको छ ।

धरानमा बेसारको पकेट क्षेत्र रहेको विष्णुपादुकामा अघिल्लो वर्षहरूमा व्यक्तिगत रूपमा खेती गर्दै आएकोमा यसपटक भने सामूहिक खेतीको सुरूआत गरिएको छ ।

किसानहरूलाई संगठित गर्ने उद्देश्यका साथ सामूहिक खेतीको शुरूआत गरिएको समूहका अध्यक्ष प्रेमकुमार राइले बताए । युवा पुस्ता कृषिबाट पलायन भइरहेको कारण सामूहिक खेतीमार्फत उनीहरूलाई कृषि तथा स्वरोजगार बनाउन र रोजगारको सृजना गर्ने अपेक्षा गरिएको अध्यक्ष राइको भनाइ छ । सामूहिक खेतीले किसानहरूलाई संगठित बनाउन र व्यवसायिकरूपमा समेत फाइदा हुने अध्यक्ष राइले बताए ।

जमीन भाडामा लिएर पहिलोपटक सामूहिक बेसार खेतीको शुरूआत समूहले गरेको बताएको छ । मौसम र मल सबै मिलेमा ५० टन भन्दाबढी बेसार उत्पादन हुने अध्यक्ष राइ बताउँछन् । हाल १ किलो बेसारको बजारमूल्य रू. १४५ छ । समूहले सोचेअनुरूप उत्पादन भए करीब रू. १ करोड बराबरकोे उत्पादन हुनेछ ।

प्रधानमन्त्री कृषि जोनमा आबद्ध भएर प्रस्ताव पेश गर्ने तयारी गरिरहँदा लकडाउन शुरू भएको कारण प्रस्ताव पेश गर्न नसकेको समूहको भनाइ छ । करीब दुई महीना लगाएर बेसार खेती गरिएको समूहका सचिव चक्र राइले बताए । उनका अनुसार सामूहिक खेतीमा प्रति केजी रू. ६० को दरले १ हजार ४२५ किलो बेसारको बीउ प्रयोग भएको छ ।

‘यहाँ खेती गर्ने स्थानमा बाली नलगाएकोले घारी रहेको थियो । हामीले यस जग्गालाई लिजमा लिएर दुई महीना लगाएर घारी फडानी गरी खेती शुरू गरेका छौ’, राइले भने, ‘किलोको रू. ६० पर्ने बीउको कुल खर्च रू. ८५ हजार ५०० रहेको छ ।’

प्रतिक्रिया [0]