जेठ १४, विराटनगर । यस क्षेत्रका उद्योग, औद्योगिक घराना र प्रतिष्ठानहरुमा बुधवार विहानबाट कालो अक्षरमा एकै खाले ब्यानर टाँगिएका छन् ।
जसमा भनिएको छ ‘आर्थिक विकास र रोजगारको आधार, उद्योग, व्यवसाय संकटमा छ सरकार’ ।
संकट समाधानका लागि हाम्रो खबदारी लेखिएका ब्यानर सरकारलाई नेपाल उद्योग वाणिज्य महासंघले सरकारलाई बुझाएको माग पुरा गराउन दबाब दिने उद्धेष्यले उद्योग संगठन मोरङ, मोरङ ब्यापार संघ र विराट ब्यापार संघको आव्हानमा उद्योगीहरुले त्यसरी ब्यानर टागेका हुन् ।
उद्योग संगठन मोरङ, मोरङ ब्यापार संघ र विराट व्यापार संघले आफ्नो कार्यालय अगाडी ब्यानर टागेका छन् । त्यसैगरि औद्यागिक घराना, औद्योगिक प्रतिष्ठान, सुनसरी मोरङ औद्योगिक करिडोरका उद्योगहरुको गेटमा समेत ब्यानर टाँगिएका छन् ।
बुधवार मुलुकभरिका उद्योग वाणिज्य संघका कार्यालय अगाडी ब्यानर टाङ्ने कार्यक्रम रहेको छ ।
उद्योग संगठन मोरङका अध्यक्ष भीम घिमिरेले उद्योग संगठन, मोरङ व्यापार संघ र नेपाल उद्योग वाणिज्य महासंघले सरकारलाई आगामी बजेटमा सम्बोधन गर्नेगरि पेश गरेको माग पुरा गराउन दबाब दिने उद्धेष्यले औद्योगिक प्रतिष्ठान लगायतमा सबैले देख्ने गरि ब्यानर टाँगिएको बताए ।
सरकारको राष्ट्रिय नारा ‘समृद्ध नेपाल सुखी नेपाली’ को लक्ष्य पुरा गर्ननै आफुहरुले रोजगारीको सृजना गर्न र मुलुकलाई आर्थिक योगदान पुर्याउनकै लागि माग पेश गरिएको घिमिरेले उल्लेख गरे ।
उनले भने, ‘आर्थिक समृद्धिका आधार भनेका नै उद्योगहरु हुन् अहिले तिनै उद्योग संकटमा छन्, त्यसैले सरकारले उद्योगीका मागप्रति नजरअन्दाज गर्न मिल्दैन ।’