कर्णालीको नीति तथा कार्यक्रम आज

३४ अर्ब बजेट ल्याउने तयारी

विनोद लम्साल

जेठ १६, वीरेन्द्रनगर । कर्णाली प्रदेश सरकारले आगामी वर्षको नीति तथा कार्यक्रमको तयारी पूरा गरेको छ । प्रदेश सरकारले आर्थिक वर्ष २०७७/७८ को नीति तथा कार्यक्रम आज (शुक्रवार) संसद्मा प्रस्तुत गर्ने भएको छ । आगामी असार १ गते करीब ३४ अर्ब हाराहारीको बजेट ल्याउने तयारी प्रदेश सरकारको तयारी छ ।

आगामी आवमा चालू आवको भन्दा कम आकारको बजेट ल्याउने तयारी गरिएको आर्थिक मामिला तथा योजनामन्त्री प्रकाश ज्वालाले जानकारी दिए । उनका अनुसार आगामी बजेट विशेषगरी स्वास्थ्य र उत्पाननमा केन्द्रित गरिनेछ  । ‘यस पटक बजेटको स्रोत धेरै नभएकाले बजेटको आकार घटाउन लागिएको हो,’ उनले भने । संघीय बजेट प्रस्तुत भएपछि कर्णाली प्रदेश सरकारलाई बजेट ल्याउन सहज भएको उनले बताए ।

अधिकांश ठूला योजना बजेटमा समेटिने उनको भनाइ छ । कर्णालीका नागरिकलाई ‘रोग र भोक’बाट जोगाउने लक्ष्यसहितको बजेट ल्याउने तयारी भइरहेको उनले बताए । ‘स्वास्थ्य र कृषिलाई मुख्य प्राथमिकतामा राखेर बजेट ल्याउने तयारी गरेका छौं,’ उनले भने । सबैभन्दा अस्पतालमा भौतिक संरचनाको विकास गर्ने, सामग्री खरीद गर्ने, आईसीयू, भेन्टिलेटर थप्ने, बेडहरूको व्यवस्थापन गर्ने, स्वास्थ्यकर्मी तथा कर्मचारी नियुक्ति गर्ने र आम नागरिकलाई स्तरीय स्वास्थ्य सेवा प्रवाह गर्ने सरकारको मुख्य उद्देश्य रहेको उनले बताए । रोग नियन्त्रणपछि सरकारको प्राथमिकता भोक निवारणमा भएकाले उत्पादन र रोजगारी बढाउने खालका योजनामा बजेट केन्द्रित गरिने उनले जानकारी उनले दिए ।

‘स्वास्थ्य, शिक्षा, उत्पादन र रोजगार : कर्णाली समृद्धिका लागि दिगो पूर्वाधार’ नाराका साथ बजेट ल्याउन लागिएको जानकारी उनले दिए । ‘अत्यावश्यक भौतिक पूर्वाधारमा लगानी जानेछ, अनावश्यक योजनामा बजेट गएको भए हेरफेर हुनेछ,’ उनले भने, ‘क्रमागत आयोजनालाई पनि बजेट विनियोजन हुनेछ, व्यावसायिक उत्पादन र सुरक्षामा ध्यान दिनेगरी बजेट आउँछ, वितरणमुखी हुँदैन ।’

प्रतिक्रिया [0]