धरानको नगरसभा अझै अन्योलमा

मेयरकै नाममा बेरुजू देखिएपछि कार्यपालिका बैठक बिथोलियो

दिनेश गजमेर

असार २८, धरान । असार १० गते शुरू भएर स्थगित धरान उपमहानगरपालिकाको नगरसभा अझै अन्योलमै रहेको छ । असार २६ गतेसम्मका लागि स्थगित नगरसभाको तयारीका लागि शुक्रवार आयोजित कार्यपालिका बैठक नै बिथोलिएपछि नगरसभा अनिश्चित बनेको हो । नगर प्रमुख (मेयर) तिलक राईले कार्यपालिका बैठक डाकेका थिए । मेयर राईको नाममा करीब १३ वर्ष अघिदेखि नगरपालिकामा बेरुजू देखिएको खबर सार्वजनिक भएपछि तर कार्यपालिका सदस्यहरूले पहिले त्यसबारे स्पष्ट पार्न माग गरेपछि बैठक अवरुद्ध भएको हो । राईले २ लाख ४१ हजार रुपैयाँ पेश्की लिएर बेरुजु रहेको देखिएको छ ।

नेकपाबाट निवार्चित वडाध्यक्षहरूले सो विषयमा बैठकमा कुरा राखेको र मेयर राईबाट चित्तबुझ्दो जवाफ नआएपछि बैठक बहिष्कार गरिएको वडा–१६ का अध्यक्ष दिलकुमार गिरीले बताए । ‘म वडाध्यक्षलाई दाग लाग्दा मेयरसाबलाई पनि लागेको हुन्छ । उहाँलाई लाग्दा हामीलाई पनि लागेसरह हो । कुरा के हो स्पष्ट पार्नुस् भन्दा चित्तबुझ्दो जवाफ आएन ।’

वडा नं ९ का अध्यक्ष रत्न कटवालले नगरसभा नहुनुमा जवाफदेही मेयर नै हुनुपर्ने बताए । मेयरको गैरजिम्मेवारीका कारण नगरसभा अन्योलमा रहेको उनको जिकीर छ । मेयर राईले बेरुजूको विषयमा स्पष्ट नपारेसम्म कुनै पनि बैठकमा सहभागी नहुने नेकपा निकट कार्यपालिका सदस्यहरूको भनाइ छ ।

मेयर तिलक राईले कार्यपालिका बैठक रोकिएको विषयमा आपूmले जिम्मेवारी लिने बताएका छन् । पेश्की फछ्र्योटको विषयमा आप्mनो जोडिएकोले त्यसमा आपूm जवाफदेही बन्नैपर्ने उनको भनाइ छ । उनले तत्कालीन समयमा संयोजक रहेर धरान–१८ स्थित बुद्धचोक विस्तारको कामका लागि पेश्की रकम लिएको र अहिलेसम्म पनि बेरुजू देखिएको पाइएको छ । 
नगरसभा असार मसान्तभित्र सक्नेगरी तयारीमा लागेको मेयर राईले बताए । नगरसभा १५ दिनभित्र सक्नुपर्ने प्रावधान छ ।

असार सकिन ४ दिन मात्र बाँकी रहँदा पनि कार्यपालिका सदस्यहरूबीचमा बजेटको ढाँचामाथि कुनै पनि छलफल हुन सकेको छैन । असारभित्र नगरसभा बस्न नसक्ने वडाध्यक्षहरूको भनाइ छ । 
 

प्रतिक्रिया [0]