२२ वर्षसम्म अधुरो सप्तरंगी पार्क झाडीमा परिणत

दिनेश गजमेर

धरान । धरानको पर्यटनको चर्चा हुँदा नछुट्ने ठाउँ हो, सप्तरंगी पार्क । यो पार्क निर्माण सुरु भएको करिब २२ वर्ष बितिसक्दा पनि पूर्णता पाउन सकेको छैन ।

धरानको प्रमुख पर्यटकीय गन्तव्य बनाउने लक्ष्य राखेर निर्माण सुरु भएको यो पार्क अहिले झाडीमा परिणत भएको छ । करिब ९ बिघा क्षेत्रफलमा फैलिएको पार्कमा खर्च भने ३ करोडभन्दा बढी भइसकेको छ ।

यो खर्चले केही संरचनाहरू बनाइएको छ, तर उचित स्याहारसम्भार अभावले ती संरचना जीर्ण बन्दै गएका छन् ।

उपमहानगरका अनुसार सन् १९९८ (२०५५ साल) मा बीडीए कन्सल्टेन्टले पार्कको डिजाइन नक्सा बनाएको थियो । डिजाइनअनुसार त्यसबेला ५ करोड लागत अनुमान गरिएको थियो ।

तत्कालीन नगरपालिकाले विभिन्न स्रोत खोजेर पहिलो चरणमा क्रमशः कम्पाउन्ड वाल, ड्रेन एज निर्माण, टिकट घर बनाउने, मूर्ति बनाउने काम गरेको थियो । पछि, सहरी विकास तथा भवन निर्माण विभागले पनि केही पिकनिक सेट बनाइदिएको योजना महाशाखाले जनाएको छ ।

करोडौं लगानी भइसके पनि पार्कले पूर्णता भने पाउन सकेन । निर्माण सुरु भएको करिब २२ वर्षसम्म लथालिंग अवस्थामा पुगेको सप्तरंगी पार्कको डीपीआर भने अब बन्न लागेको उपमहानगरले जनाएको छ ।

‘२२ वर्षअगाडि काठमाडौंको कन्सल्टेन्ट बीडीए नेपालले गरेको डिजाइनमा ५ करोडको लागत स्टिमेट तयार गरेको थियो । पार्कमा ३ करोड खर्च भइसकेको छ,’ वरिष्ठ इन्जिनियर सुरज श्रेष्ठले भने, ‘नगरपालिकाले स्रोत जुटाएर विभिन्न चरणमा स्मारक पार्क, बाल उद्यान, कम्पाउन्ड वाल, पिकनिक स्पटलगायत केही संरचना बनेका छन् । तर, विविध कारणले बीचैमा रोकियो । अब पुनः नयाँ डीपीआर निर्माणको प्रक्रियामा छ ।’

धरान–१७ रेल्वेचोकदेखि करिब एक किलोमिटर दूरीमा सप्तरंगी पार्क रहेको छ । पूर्वमेयर स्वर्गीय ध्यानबहादुर राईको पालामा खोलाको बगर भएको जग्गालाई संरक्षण गरेर पार्कको रूपमा विकास गर्ने उद्देश्यले काम सुरु गरिएको थियो ।

डीपीआरबिना महत्वाकांक्षी योजना अगाडि बढाउँदा निर्माणाा अन्योल सिर्जना भएको वडा कार्यालयको भनाइ छ ।

‘पर्यटनका हिसाबले के–के बनाउने भनेर डीपीआरबिनै काम थालियो । त्यसले गर्दा बीचमा अन्योल सिर्जना भयो,’ वडा–१७ का अध्यक्ष मनोज भट्टराईले भने, ‘अब डीपीआर तयार हुँदै छ । विगतमा जस्तो अन्योल हुँदैन ।’

निर्माणाधीन पार्कको वरिपरि घेराबार लगाइए पनि संरक्षण अभावमा पार्क स्थल झाडी, जंगल बनेको छ । पार्क परिसरमा निर्माण गरिएका संरचना लथालिंग अवस्थामा छन् ।
महत्वपूर्ण योजनामा रहेको पार्क निर्माणमा सम्बन्धित पक्षले गम्भीरता नदेखाएको प्रा.डा. राजेन्द्र शर्माको भनाइ छ । ‘२७ वर्षअघि ध्यानजी मेयर हुँदा संरक्षणविहीन अवस्थामा रहेको ऐलानी जग्गा नगरपालिकाको अधीनमा ल्याइएको हो । तत्कालीन १० नम्बर वडाध्यक्ष योगेन्द्र लिम्बूले केही मूर्ति बनाउने र केही रुखबिरुवा रोप्ने काम भएको थियो । केही संरचना बन्ने क्रममा रोकिएर लथालिंग अवस्थामा छ,’ शर्माले भने, ‘अब फेरि थुप्रै संरचना समेटेर डीपीआर बनाउन लागेको भन्ने सुन्नमा आएको छ । पीपीपी मोडलमा लगेर निर्माण गर्ने नगरपालिकाको योजना रहेको छ । पूरा यो भने पक्कै पनि एउटा हेर्न लायकको पार्क बन्छ ।’

डीपीआर बनेपछि लामो समयदेखि थातिरहेको पार्क निर्माणले अब गति लिने  धरान उपमहानगरले जनाएको छ । पार्कको डीपीआर बन्ने अन्तिम चरणमा पुगेको र कसरी सञ्चालनमा ल्याउने भन्ने विषयमा समेत छलफल जारी रहेको उपमहानगरको भनाइ छ ।

‘उपमहानगरले १५–२० वटा डीपीआर तयार गर्दै छ । त्यसमा सप्तरंगी पार्कको दीर्घकालीन योजनासहितको डीपीआर तयार पार्न टेन्डर आह्वान गरेका छौं । कन्सलटेन्टले डीपीआर तयार गरेपछि निजी क्षेत्रका लागि खोल्छौं,’ नगरप्रमुख तिलक राईले भने, ‘जो इच्छुक निजी क्षेत्र छ, उसले सम्भाव्यता, विश्वसनीयता हेरेर सम्झौता गरी लिज प्रक्रियाबाट अगाडि बढाउँछौं ।’

प्रतिक्रिया [0]