वीपी प्रतिष्ठानमा खपतभन्दा चार गुणा बढी अक्सिजन 

प्रति मिनेट १ हजार ६०० लिटर उत्पादन

दिनेश गजमेर

वैशाख १८, धरान । छिमेकी मुलुक भारतमा अक्सिजन नपाएरै कोरोना संक्रमितहरुको मृत्यु बढ्दै गएपछि नेपालमा पनि अक्सिजनको अभाव हुने चिन्ता हुन थालेको छ । 

अहिले जटिल अवस्थाका बिरामीहरूको संख्या बढ्दै गएको र अस्पताल भर्ना भएका धेरैलाई अक्सिजन दिनुपर्ने अवस्था आइरहेको छ । 

प्रदेश १ मा पनि कोरोना संक्रमित बढ्दै गएपछि कोभिड अस्पतालहरु तयारी अवस्थामा राख्न थालिएको छ । अझ अक्सिजनको कमी हुन नदिन सबैको चासो बढेको छ । प्रदेश सरकारले पनि अक्सिजनको कमी हुन नदिन अक्सिजन प्लान्ट निर्माण गर्नेतर्फ पनि योजना अघि सारेको छ । 

सोमवार मुख्यमन्त्री शेरधन राईले धरान स्थित वीपी कोइराला स्वास्थ्य विज्ञान प्रतिष्ठानको कोभिड अस्पतालको तयारीको अवस्थामा बुझ्दै अक्सिजन पर्याप्त मात्रामा राख्न निर्देशन समेत गरेका छन् । 

प्रतिष्ठानको आफ्नै अक्सिजन प्लान्ट हुँदा पनि पहिलो चरणको कोरोना संक्रमणको बेलामा कोभिड अस्पतालमा अक्सिजनको अभाव हुँदा संक्रमितहरुको मृत्यु समेत भएको थियो । अहिले भने पूर्णरुपमा धान्न सक्ने अवस्थामा तयारी गरेको प्रतिष्ठानले जानकारी दिएको छ । अघिल्लो वर्षको कोरोना संक्रमणको समयमा कोभिड अस्पताल पूर्णरुपमा तयारी नहुँदा बिरामीहरुले अक्सिजन पाउन नसक्दा आलोचना खेप्नु परेको थियो । 

प्रतिष्ठानका सहप्रवक्ता डा. चुरामनी पोखरेलका अनुसार अहिले प्रतिष्ठानको आफ्नै अक्सिजन प्लान्टबाट प्रति मिनेट १ हजार ६०० लिटर अक्सिजन उत्पादन भइरहेको छ । खपत क्षमताभन्दा चार गुणा बढी अक्सिजन उत्पादन हुने गरेको उनले बताए । 

उनले भने, ‘अघिल्लो वर्ष ४ ओटा टावलमध्ये दुई ओटा मात्रै सञ्चालनमा थियो, २ ओटा बिग्रिएको थियो, त्यसैले प्राविधिक समस्या भयो, अहिले फुल फेसमा ४ ओटै टावल सञ्चालनमा छन्, त्यसैले कुनै समस्या आउँदैन ।’  

प्रतिष्ठानका सबै विभागहरुमा प्रयोग भएको अक्सिजन ४०० देखि ५०० लिटर प्रति मिनेट रहेको छ । खपतभन्दा पनि चार गुणा बढी उत्पादन भएकाले कुनै समस्या नआउने पोखरेलको भनाइ छ । 

उनले भने, ‘पिक आवरमा पनि ४० प्रतिशत मात्रै खपत हुने गरेको छ, कोभिड अस्पतालमा १०० जना बिरामी नै भर्ना भए पनि धान्न सक्ने अवस्थामा रहेको छ ।’ प्रतिष्ठानमा उत्पादन भएको अक्सिजन करीब ४०० देखि ५०० बिरामी भर्ना भए पनि धान्न सक्ने छ । 

कोभिड अस्पतालमा पूरै १०० बेडमै अक्सिजन पाइपलाइन विस्तार गरिसकेको छ । पाइपलाइनमा कुनै समस्या आए विकल्पका लागि सिलिण्डरबाट पनि पाइपलाइनमा जोड्न सकिने व्यवस्था गरिएको छ ।

अहिले स्टक राख्नु पर्ने अवस्था नरहेपनि बिरामीको संख्या बढ्दै गएमा तयारी रहन सिलिण्डर थप गर्ने तयारी गरिएको उनले बताए । उनले भने, उत्पादन क्षमता अधिकतम हो, भोलिका दिनमा सर्टेज हुन सक्ने कुरालाई मध्यनजर गर्दै प्लान्ट थप्ने कि भन्ने कुरा पनि हुँदैछ, तर ठोस निर्णय भएको छैन ।’

प्रतिक्रिया [0]