मुगु बस दूर्घटना : प्रदेश प्रहरीद्वारा छानबिन समिति गठन

असोज २८, मुुगु । कर्णाली प्रदेश प्रहरी कार्यालय सुर्खेतले मुुगुमा मंगलवार भएको बस दूर्घटनाको छानबिन गर्न समिति गठन गरेको छ । 

बस दूर्घटनाको सत्यतथ्य पत्ता लगाई १० दिनभित्र प्रतिवेदन पेस गर्न प्रदेश ट्राफिक प्रहरी कार्यालयका प्रहरी नायव उपरीक्षक वीरेन्द्रवीर विश्वकर्माको संयोजकत्वमा तीन सदस्यीय समिति गठन गरेको सो कार्यालयले जानकारी दिएको छ । 

समितिमा प्रदेश प्रहरी कार्यालयका प्रहरी निरीक्षक जीवन लामिछाने र प्रदेश ट्राफिक प्रहरी कार्यालयका हबल्दार हरि लामिछाने सदस्य रहेका छन् । नेपालगञ्जबाट मुगु सदरमुकाम गमगढी जाँदै गरेको छायाँनाथ रारा यातायात प्रालिद्वारा सञ्चालित भे १ ख ३१६७ नंको उक्त बस मंगलवार जुम्ला–मुुगु सडक खण्डमा पर्ने पिनातपने खोलामा दूर्घटना हुँदा ३२ जनाको मृत्यु हुनुका साथै १३ जना घाइते भएका थिए । 

समितिले घटनाको अनुसन्धान प्रतिवेदन तयार गरी प्रदेश प्रहरी प्रमुख एवम् प्रहरी नायव महानिरीक्षक गणेशबहादुर ऐरसमक्ष पेस गर्नेछ । 

चालकको सिटमुनिको टायर पङ्चर भई दूर्घटना भएको प्रारम्भिक अनुमान गरिए पनि छानबिन समितिको स्थलगत अनुसन्धान प्रतिवेदनका आधारमा वास्तविक कारण पत्ता लाग्ने बताउँदै प्रहरी नायव महानिरीक्षक ऐरले भने, ‘बस, सडक वा चालक कसको के कमजोरीका कारण दूर्घटना हुन पुग्यो त्यसको अध्ययन हुनेछ ।’ रासस

प्रतिक्रिया [0]