कालीकोटमा ३३ केभी विद्युत् प्रसारण लाइन जडान

कालीकोट । कालीकोटमा नेपाल विद्युत् प्राधिकरणको ३३ केभी राष्ट्रिय प्रसारण लाइन जडान गरिएको छ । यसअघि दैलेखेको दुल्लुदेखि कालीकोट हुँदै जुम्लासम्म ११ केभी विद्युत् जडान गरिएकोमा त्यसलाई थप गरेर ३३ केभीमा विस्तार गरिएको हो ।

विगतमा कालीकोटमा ११ केभी प्रसारण लाइनमा विद्युत्को भोल्टेज घटबढ हुने समस्या र नागरिकको माग अनुसार विद्युत् आपूर्ति गर्न ३३ केभी प्रसारण लाइन जडान गरिएको नेपाल विद्युत् प्राधिकरण कालीकोट वितरण केन्द्रका प्रमुख नारायणप्रसाद पौडेलले जानकारी दिए । उनले भने, ‘यसले विद्युत् आपूर्ति नियमित हुने तथा भोल्टेजमा घढबढ हुँदैन ।’ यो कार्यसँगै कालीकोटको सदरमुकाम मान्मबाट जिल्लाका सबै पालिकाको केद्रसम्म विद्युत् प्रसारण लाइन विस्तारको काम अघि बढ्ने प्रमुख पौडेलले बताए ।

‘जिल्लाका ९ पालिकामध्ये ३ मा विद्युत्को राष्ट्रिय प्रसारण लाइन जडान भएको छ,’ उनले भने, ‘अब सबै पालिकामा विद्युत्को राष्ट्रिय प्रसारण लाइन जडान हुनेछ ।’ कर्णालीका दशमध्ये अझै तीन जिल्लामा विद्युत्को राष्ट्रिय प्रसारण लाइन जडान हुन सकेको छैन ।

दुई वर्षमा कर्णालीका सबै जिल्लामा विद्युत्को राष्ट्रिय प्रसारण लाइन जडान गर्ने र त्यसका लागि विद्युत् प्राधिकरणले रू. २५ अर्बको बजेट विनियोजन गरेको प्राधिकरणका कार्यकारी निर्देशक कुलमान घिसिङले जानकारी दिए । ‘अहिले विद्युत् नपुगेका हुम्ला, मुगु र डोल्पामा सोलार प्लान्ट जडान गरेर विद्युत्को आपूर्ति गरिनेछ,’ उनले भने, ‘अन्य जिल्लामा विद्युत्को लाइन विस्तार गरेर दुई वर्षमा कर्णालीका सबै गाउँ गाउँमा विद्युत् पुर्‍याइनेछ ।’ रासस

प्रतिक्रिया [0]