३६ वर्षमा पनि सम्पन्न भएन कालीकोटको सुनथराली विमानस्थलको निर्माण कार्य

चैत ३०, कालीकोट । कालीकोटको नरहरिनाथ गाउँपालिका–१ कोटवाडामा निर्माणाधीन सुनथराली विमानस्थलको धावनमार्गमा आगामी असार मसान्त भित्रमा कालोपत्र सम्पन्न गर्ने लक्ष्य राखिएको छ । यसका लागि आगामी वैशाखको पहिलो हप्तादेखि काम सुरुआत हुने जानकारी दिइएको छ ।  

अहिले विमानस्थलको टावर, भवन, वरपर माटो काट्ने र नाला बनाउने काम सम्पन्न भइसकेको नेपाल नागरिक उड्डयन प्राधिकरणका इन्जिनियर रत्नबहादुर श्रेष्ठले जानकारी दिए । 

‘आगामी वैशाख पहिलो हप्तादेखि विमानस्थलको धावनमार्गमा कालोपत्र शुरु गर्ने गरी काम भइरहेको छ ।’ उनले भने, ‘लामो समयदेखि काम नहुँदा अन्यौलमा रहेको विमानस्थल पछिल्लो वर्षमा द्रुत गतिमा काम भएको हो ।’

विमानस्थलसम्म सडक नपुग्नु, विगतको सशस्त्र द्वन्द्व, कोभिडलगायतका कारणले विमानस्थलको काम कछुवाको गतिमा भएको थियो । यस आर्थिक वर्षभित्र निर्माण सम्पन्न गर्ने गरी ठेकेदार कम्पनीलाई प्राधिकरणले समयसीमा दिएको छ । 

धावनमार्ग ६९० मिटर लम्बाइ र ६० मिटर चौडाइ रहने  छ । विसं २०४२ देखि हालसम्म विमानस्थल निर्माणमा रू. ३९ करोड खर्च भइसकेको जानकारी दिइएको छ । 

विमानस्थलसम्म निर्माण सामग्री लैजान ठेकेदार कम्पनीलाई समस्या भएको  गौरी पार्वती श्याम एण्ड शंकर जेभीका प्रतिनिधि कलम केसीले जानकारी  दिए ।

‘कच्ची, अप्ठे्यारो सडक भएकाले निर्माण सामग्री लिन निकै गाह्रो छ ।’ उनले भने, ‘हामीले वैशाखको पहिलो हप्ताबाट धावनमार्ग कालोपत्र गर्ने तयारी गरेका छौँ । असारसम्म निर्माण सम्पन्न गर्ने लक्ष्य रहेको छ ।’

सो कम्पनीले कालोपत्रे गर्न, नाला र माटो काट्न रू. १३ करोड ८१ लाख ठेक्का लिएको तथा भवन र टावर निर्माणका लागि पिआर इन्फ्रास्टक्चरले रू. तीन करोड ४७ लाख ७४ ठेक्का लिएको जानकारी दिइएको छ । रासस

प्रतिक्रिया [0]