ई –पेपर | विज्ञापन | ग्राहक बन्नुहोस | Podcast |
arthik abhiyan

सडक विस्तारसँगै बढ्यो बजार

२०७९ सावन, ३  
कर्णाली प्रदेश
Aarthik Abhiyan 18th Anniversary NA

जाजरकोट । सडक विस्तारसँगै जाजरकोट, दैलेख र रुकुमपश्चिमका दुर्गम बस्तीमा बजार विस्तार हुन थालेको छ । मध्यपहाडी (पुष्पलाल) लोकमार्ग निर्माणसँगै ती जिल्लाका दुर्गम ग्रामीण बस्तीमा स्थानीय बजार विस्तार हुन थालेको हो ।

यातायातको पहुँच पुगेसँगै पछिल्लो समय थलहबजार, दशेरा, सुयडा, बेस्तडा बजार, लोहोरे, दैलेख बजार, रावतकोट, जम्मुकाँध र राकमबजार आर्थिक केन्द्रका रूपमा विकास भइरहेका छन् । त्यस्तै रुकुमपश्चिमको चौरजहारीमा नयाँ शहर निर्माणको काम जारी छ ।

पूर्वी नेपालको पाँचथर जिल्लाको चियोभन्ज्याङबाट मध्यपहाड हुँदै बैतडीको झुलाघाटसम्म २६ ओटा पहाडी जिल्ला हुँदै निर्माणाधीन मध्यपहाडी लोकमार्गले आर्थिक, सामाजिक, सांस्कृतिक, पर्यटकीय विकासमा समेत योगदान दिन थालेको छ । एक हजार ८७९ किलोमिटर लामो मध्यपहाडी लोकमार्गले २१५ बस्तीलाई जोडेको छ । मध्यपहाडी क्षेत्रमा बसोवास गर्ने करीब १ करोड जनतालाई लाभ पुर्‍याउने लक्ष्यका साथ आयोजना निर्माण भइरहेको छ ।

पहिले–पहिले नुनतेलको जोहो गर्न हप्तौं लगाएर नेपालगञ्ज, बर्दिया झर्नुपर्ने बाध्यता रहेकोमा अब त्यसको अन्त्य हुने अपेक्षा गरिएको छ । पहाडका अप्ठ्यारा बाटा, घोप्टे भीर काट्दै बबई नदी, भेरी नदी तरेर, कट्टीको गल्छी पार गर्ने बाध्यताको अन्त्य हुने अपेक्षा सहित स्थानीय उत्साहित छन् ।

मध्यपहाडी लोकमार्ग आयोजनाअन्तर्गत सर्वाधिक लामो १२५ किलोमिटर सडकखण्ड दैलेख जिल्लाभित्र पर्दछ । दैलेखमा भगवतीमाई गाउँपालिका–४ सुयडा क्षेत्रबाट प्रवेश गरी सो जिल्लाका आठओटा पालिकालाई समेट्दै आठबीस नगरपालिका–३ बेलखेतबाट बाहिरिन्छ । स्थानीय उत्पादनले बजार पाएको छ । घरघडेरीको मूल्यसँगै वित्तीय संस्थाहरूले लगानी पत्याउन थालेका छन् ।

रोजगारी र अवसरको खोजीमा होस् या अभावका कारण परिवारसहित हुने बसाइँसराइ निरुत्साहित गर्न पनि सो आयोजनाले ठूलो सहयोग गरेको छ । स्थानीय नागरिक रोजगारीमा जोडिएका छन् ।

स्थानीय प्रत्येक घरका महिला रोजगारीमा जोडिएका छन् । रुकुमपश्चिम, जाजरकोट, दैलेख र अछामको बीचबाट पूर्व–पश्चिम भएर सडक निर्माण भएपछि नेपाल सरकारले तय गरेका सय ओटा पर्यटकीय गन्तव्यको सूचीमा परेका पर्यटकीय क्षेत्रमध्ये ६ ओटा गन्तव्यसमेत यस लोकमार्गमा जोडिएका छन् । आन्तरिक तथा बाह्य पर्यटन प्रवद्र्धनमा समेत टेवा पुगेको छ ।

लोहोरेखोलाबाट जाजरकोट जिल्लाको थलहबजारसम्म ५२ किलोमिटर सडक कालोपत्रसहित स्तरोन्नति भइरहेको छ । ६ ओटा निर्माण कम्पनीले रू. दुई अर्ब ६५ करोड रुपैयाँको ठेक्का लिएको आयोजना कार्यालयका प्रमुख युवराज पोखरेलले बताए ।

पुष्पलाल लोकमार्ग योजना कार्यालय दैलेखअन्तर्गत पूर्वीरुकुम, पश्चिमरुकुम, जाजरकोट, दैलेख र अछाम गरी पाँच जिल्ला यस योजना कार्यालयको कार्यक्षेत्रअन्तर्गत पर्छन् । रुकुमपूर्वबाट अछामसम्म योजनाको जिम्मेवारीमा रहेको करीब ४४० किलोमिटर सडक आर्थिक वर्ष २०७९/८० मा सम्पन्न गर्ने लक्ष्यका साथ कामलाई तीव्रता दिइएको बताइएको छ । रासस

Neco insurance LimitedAarthik Abhiyan Viber Community
प्रतिक्रिया [0]

   

vw
धेरै पढिएको

Nepali PatroSaurya Cement (replace Riddhi Siddhi Cement)