कर्णालीमा हवाईजहाजको टिकट लिन अनलाइनको व्यवस्था गर्न माग

कर्णाली । कर्णालीमा सहज हवाई यातायातको टिकट लिन नभएको भन्दै अनलाइन टिकटको व्यवस्था गर्न माग गरिएको छ ।

दुर्गम हिमाली जिल्ला हुम्ला, मुगु, डोल्पा तथा जुम्लाका नागरिकको सहज यातायातका लागि अनलाइन टिकट अनिवार्य रूपमा लागू हुनुपर्ने माग गरिएको हो ।जिल्ला प्रशासन कार्यालय मुगुका प्रमुख जिल्ला अधिकारी रोमबहादुर महतले दुर्गमका नागरिकको हवाई यातायातको समस्या सम्बोधनका निम्ति आवश्यक पहलका लागि गृह मन्त्रालयलगायत निकायलाई अनुरोध गरिएको बताए ।

‘गमगढीसम्म सडक जोडिए पनि भौगोलिक विकटता र जीर्ण सडकले यातायात नियमित र व्यावसायिक हुन सकेको छैन,’ उनले भने, ‘यहाँका बिरामी, अशक्त, महिला, बालबालिका र ज्येष्ठ नागरिकसहित रारा आउने पर्यटकका लागि यातायातको एकमात्र विकल्प हवाई यातायात हो ।’ 

यसमा अनलाइन टिकटको व्यवस्था नहुँदा कालोबजारी बढ्नुका साथै टिकट लिन अनावश्यक भीडभाड र झैझगडा हुँदा शान्ति सुरक्षा प्रदान गर्नसमेत चुनौती थपिएको उनले बताए । उनका अनुसार कर्णालीमा सेवारत नेपाल एयरलाइन्स, सीता, तारा र समिट एयरलायन्सले हवाई टिकट व्यवस्थित नगर्दा यात्रुले हैरानी खेप्नुपरेको छ । 

मुगुलगायत माथिल्लो कर्णालीका सबै जिल्लाका यात्रुको चापको अनुपातमा नियमित हवाई उडान र त्यसका लागि एयरलाइन्सको हवाई टिकट वितरण अनलाइन प्रणालीमार्फत हुन सकेमात्र यहाँका नागरिकलाई सहज हुने प्रमुख जिल्ला अधिकारी महतले बताए ।

अनलाइन टिकट वितरण सञ्चालनमा ल्याउन जुम्लाका प्रमुख जिल्ला अधिकारी मुकेशकुमार केसरीले सर्वदलीय बैठक बसेरै यसअघि निर्णय गरिसकेको बताए । 
कर्णालीको हवाई उडानको समस्या सामाधानका लागि पूर्वमन्त्री नरेश भण्डारी नेतृत्वको टोलीले गत असोज ३० गते संस्कृति तथा पर्यटनमन्त्री जीवनराम श्रेष्ठलगायत सरोकारवालालाई ध्यानाकर्षणसहित मागपत्र बुझाएको थियो । -रासस

प्रतिक्रिया [0]