नेवानीद्वारा श्वेतपत्र जारीः निगम उच्च आर्थिक जोखिममा, सरकारसँग आर्थिक सहायता माग (श्वेतपत्रसहित)

टीपी भुसाल

कात्तिक २९, काठमाडौं । नेपाल वायुसेवा निगम (नेवानी)ले श्वेतपत्र जारी गर्दै संस्था उच्च आर्थिक जोखिममा रहेको जानकारी गराएको छ । निगमले संस्थाको जोखिम कम गर्न, संस्थालाई थप बलियो र प्रतिस्पर्धी बनाई विश्वसनीयता कायम गर्न सरकारसँग आर्थिक सहायता माग गरेको छ ।

बिहीवार निगमको केन्द्रीय कार्यालयमा आयोजित पत्रकार सम्मेलनमा श्वेतपत्र जारी गर्दै निगमका अध्यक्ष मदन खरेलले निगमको कर्जा अत्याधिक रहेको र ब्याज पनि धेरै भुक्तानी गर्नुपर्ने भएकाले सरकारले तत्काल आर्थिक सहायता दिएर निगमको जोखिम कम गर्नुपर्ने बताए ।

निगमको जहाजको तिर्नुपर्ने कर्जा रू. ३२ अर्ब ८७ करोड रहेको तथा दीर्घकालीन कर्जा र जम्मा पूँजी रू. ३९ अर्ब ८२ करोड रहेकाले निगम उच्च जोखिममा रहेको स्वेतपत्रमा उल्लेख छ । निगमले ‘ए–३३० वाइड बडि’ एयरबस किन्न सरकारको जमानीमा कर्मचारी सञ्चय कोष र नागरिक लगानी कोषबाट ऋण लिएको थियो ।

कर्जा तिर्नका लागि निगमले वाषिर्क १० दशमलव ५० प्रतिशतका दरले ब्याज भुक्तानी गर्नुपर्ने हुन्छ । कर्जाको किस्ता र ब्याज तिर्नुपर्ने भएकाले यसबाट निगमको तरलता र नाफामा सिधै असर परेको अध्यक्ष खरेलले बताए । निगमको अहिले अधिकृत पूँजी रू. ३० करोड मात्र छ भने पूँजी लगानी रू. ३ अर्ब १० करोड छ । अधिकृत पूँजीभन्दा लगानी पूँजी बढी भएकाले यसलाई यथाशीघ्र नियमित गर्न निगमले सरकारसँग पूँजी थप गर्न माग गरेको हो ।

निगमले आफूसँग भएका सबै जहाज उडान गर्न र नयाँ विमानहरुको गन्तव्यका विषयमा सम्बन्धित मुलुकसँग छलफल भइरहेकाले केही समयमै वाइडबडि विमानले लामो दूरीमा उडान गर्ने जानकारी गराए । ति विमानको लागि जापान, रियाद र कोरियामा उडान सञ्चालन गर्न आवश्यक प्रक्रिया अगाडि बढाइएको र जीएसए छनोट कार्य पनि भइरहेको श्वेतपत्र जारी गर्दै निगमका अध्यक्ष खरेलले जानकारी दिए ।

प्रतिक्रिया [0]