स्वरोजगार बनाउँदै होम स्टे : सालको टपरीमा स्थानीय खाना

विनोद लम्साल

वीरेन्द्रनगर । सुर्खेतको बराहताल गाउँपालिका–५ स्थित सालघारी टोलका १० घरले पर्यटनको विकास गरी स्वावलम्बी बन्न होम स्टे सञ्चालनमा ल्याएका छन् । हाल आआफ्नो घरमा शुरुआत गरेको होम स्टेलाई नमूनाका रूपमा विस्तार गर्दै छन् । ‘हामीले तालीम लिएपछि आाफ्नो घरबाट शुरू गर्‍यौं,’ आमा समूहकी अध्यक्ष सारू मगरले भनिन्, ‘सबैको साथ र सहयोगमा यसलाई अझै राम्रो गराउने योजना छ ।’ होम स्टेमा विशेषगरी मगर जातिको परिकार बनाइन्छ । पाहुनालाई सालको टपरीमा स्थानीय खाना ढिडो, सिस्नो, मकै कोदोको रोटी, मासको रोटी, सेलरोटी, गुन्द्रुकको अचार, मकैको रोटी, सुङ्गुर र लोकल कुखुराको मासुको परिकार पाइन्छ । होम स्टेमा आएका पाहुनाबाट पनि राम्रो प्रतिक्रिया आएको भन्दै होम स्टे सञ्चालन गर्न अझ हौसला थपिएको उनले बताइन् । स्थानीयले होम स्टे सञ्चालनमा ल्याएपछि आर्थिक आर्यआर्जनमात्र नभई त्यहाँको पहिचान पनि भएको छ । सालघारी सुनद्वारी होम स्टेमा अहिले १० परिवारले सञ्चालन गरेका होम स्टेमा अहिले आन्तरिक पर्यटकहरूको सङ्ख्या बढ्दो छ । होम स्टे सञ्चालका लागि व्यवस्थापन समितिले विभिन्न उपसमिति बनाएको छ । सांस्कृतिक, पाहुना सत्कार, खाना व्यवस्थापनलगायत उपसमिति रहेका छन् । स्थानीय मौलिकता झल्किने सांस्कृतिक कार्यक्रममार्फत होम स्टेमा आएका पाहुनालाई मनोरञ्जनसमेत दिने गरिएको छ । जनजाति समुदायको मारुनी नाच, टप्पा नाच झ्याउरे नाच देखाउने गर्छ । अब होम स्टेलाई दर्ताको प्रक्रियामा ल्याएको जानकारी दिँदै होम स्टे व्यवस्थापन समितिका अध्यक्ष नरेश जोल्मीले नमूनाको रूपमा सञ्चालन गर्ने जानकारी दिए । स्थानीय टोपबहादुर आलेले होम स्टे आयआजर्नका लागि राम्रो बन्दै गएको बताए । ‘अब बाहिर कमाइ गर्न जाने सोच छैन,’ उनले भने, ‘होम स्टे सञ्चालन भएपछि घरमै बसेर आम्दानी गरिरहेको छु, नमूना काम गर्न पाउँदा खुशी छु ।’

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस