आप्रवासीका लागि काम गर्न र बस्न सिङ्गापुर उत्कृष्ट

रमा सुवेदी

काठमाडौं । हामी धेरै कमाइ हुने काम, शिक्षा स्वास्थ्यलगायत भौतिक पूर्वाधार र सेवा सुविधा पाउने आशामा गाउँबाट शहर अनि शहरबाट विदेश जान्छौं । एउटै कामका लागि पनि देश र विदेशमा पाउने तलब सुविधा निकै फरक हुन सक्छ । हालै सार्वजनिक एक सर्वेक्षण प्रतिवेदनले पनि यस्तै देखाएको छ । विदेशमा गएर काम गर्दा अहिले गरिरहेकै कामको तुलनामा बढी तलब मिल्ने निष्कर्ष बेलायती बहुराष्ट्रिय बैङ्क एचएसबीसीको भर्खरै सार्वजनिक ‘एक्स्पाट एक्सप्लोरर’ प्रतिवेदनले निकालेको छ । एउटै कामका लागि स्वदेशमा भन्दा विदेशमा बढी तलब पाएको सर्वेक्षणमा संलग्न ४५ प्रतिशत आप्रवासीहरूले बताएका छन् । २८ प्रतिशत सहभागीले भने पदोन्नतिकै लागि आफूले स्थान परिवर्तन गरेको बताएका छन् । विदेशीका लागि काम गर्न र बस्न सिङ्गापुर विश्वमै उत्कृष्ट छ । यससँगै लगातार चौथो वर्ष पनि सिङ्गापुर सूचीको अग्रस्थानमा रहन सफल भएको हो । ‘सिङ्गापुरमा विदेशीलाई आकर्षित गर्ने सबै चिज छ,’ प्रतिवेदनमा एचएसबीसीले भनेको छ । सूचीको बाँकी शीर्ष चार स्थानमा गतवर्षझैं यस वर्ष पनि न्यूजिल्याण्ड, जर्मनी र क्यानडा छन् । गतवर्ष नवौं स्थानमा रहेको बहराइन यस वर्ष ४ स्थान माथि उक्लिएर पाँचौं स्थानमा आएको छ । सूचीको बाँकी रहेको शीर्ष १० मा भने अष्ट्रेलिया, स्वीडेन, स्वीट्जरल्याण्ड, ताइवान र संयुक्त अरब इमिरेट्स छन् । विदेशमा गएर काम गर्दा औसत कर्मचारीहरूको तलब वार्षिक २१ हजार डलरसम्म बढेको प्रतिवेदनले देखाएको छ । प्रतिवेदनअनुसार स्वीट्जरल्याण्ड, अमेरिका र हङकङमा विदेशी कर्मचारीहरूले सबैभन्दा बढी तलब पाउने गरेका छन् । स्वीट्जरल्याण्डमा वार्षिक औसत तलब गतवर्षको तुलनामा ६१ हजार डलर बढेको छ । त्यहाँ वार्षिक तलब औसत २ लाख ३ हजार डलरनजीक छ । यो विश्वको औसत स्तरभन्दा दोब्बर हो । तर, त्यहाँ आप्रवासीका बालबच्चा हुर्काउन धेरै खर्च लाग्ने र साथीभाइ बनाउन पनि निकै अप्ठ्यारो भएको बताइएको छ । अमेरिकामा औसत तलब १ लाख ८५ हजार र हङकङमा १ लाख ७९ हजार डलर छ । सबैभन्दा धेरै लैङ्गिक समता भएको देश स्वीडेन भने आप्रवासीका परिवारका लागि निकै राम्रो छ । अनुभवको श्रेणीमा न्यूजिल्याण्ड, स्पेन र ताइवान सबैभन्दा अगाडि छन् । महिला र पुरुषबीचको विभेदलाई यस सर्वेक्षणले थप स्पष्ट पारेको छ । रोजगारीका लागि स्थान परिवर्तन गर्दा महिलाहरूको आय केही प्रतिशत मात्रै बढेको पाइएको छ । करियर र पदोन्नतिका लागि ३३ प्रतिशत महिला मात्रै विदेश जाने गरेका छन् । पुरुषहरूमा यो दर ४७ प्रतिशत छ । महिलाहरूको औसत वार्षिक तलब पनि पुरुषको भन्दा ४२ हजार डलर कम पाइएको छ । एजेन्सी

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस