अनियन्त्रित रूपमा चलाउन दिनु हुन्न डीके ढुङ्गाना वरिष्ठ उपाध्यक्ष, प्याब्सन निजी विद्यालयहरूले विद्यालयमा वाइफाइ उपलब्ध गराएको त धेरै भइसक्यो । तर कक्षा १२ (विद्यालय तह)सम्म तीन एम (मोटरसाइकल, मोबाइल र मिनिस्कट) प्रतिबन्ध गरिएका कारण विद्यार्थीले मोबाइलमा वाइफाइ सुविधा प्राप्त गर्ने भन्ने कुरै रहेन । कम्प्युटर ल्याबमा रहेका ल्यापटप, कम्प्युटर जस्ता डिभाइसमा प्रयोग गर्न दिँदा पनि विद्यार्थीले निर्धारित वेबसाइट तथा प्रोग्राम मात्रै चलाउन सक्ने गरिएको हुन्छ । विद्यालय उमेर परिपक्वता आइनसकेको अवस्था हुने भएकाले सूचना प्रविधिको युग भनेर अनियन्त्रत रूपमा तथा विद्यार्थीले आफ्नै मोबाइल प्रयोग गरेर इण्टरनेट चलाउन पाउने अवस्था भयो भने दुर्घटना हुन सक्छन् । त्यसैले यदि सरकारले ऐनमार्फत नै विद्यार्थीलाई निःशुल्क वाइफाइ सुविधा दिन लागेको हो भने पनि विशेष सतर्कता अपनाउन जरुरी हुन्छ । विद्यार्थीको तहअनुसारका सामग्री मात्र हेर्ने व्यवस्था हुनुपर्छ सुप्रभात भण्डारी पूर्वअध्यक्ष, अभिभावक सङ्घ नेपाल सरकारले डिजिटल डिभाइसमार्फत शिक्षा दिने उद्देश्यले विद्यार्थीलाई निःशुल्क वाइफाइ प्रयोग गर्न दिन खोजेको हो भने ठीकै छ । तर, प्रयोग पनि केमा र कसरी गर्न दिने भन्ने विषय प्रमुख हुन्छ । विगतका दिनमा पनि ‘एक विद्यार्थी, एक ल्यापटप’ जस्ता कार्यक्रम आए । तर, त्यसको उचित उपयोग हुन सकेन । सरकारले त्यसैगरी ‘एक विद्यार्थी, एक डिभाइस’ दिएर निर्धारित सामग्री मात्रै हेर्न/चलाउन मिल्ने गरिदिने हो भने राम्रै हो । त्यसो गर्दा पनि विद्यार्थीको तह हेरेर कुन कक्षादेखि कुन कक्षाका विद्यार्थीलाई के के हेर्न मिल्ने गर्ने निश्चित गरिनुपर्छ । आजभोलि त सानो उमेरदेखि नै मोबाइल चलाउने प्रचलन बढ्दो छ । विद्यार्थीले घरैबाट मोबाइल बोकेर ल्याउने र निःशुल्क वाइफाइ प्रयोग गर्न पाउने चाहिँ हुनु हुँदैन ।