पर्यटन मन्त्रालयको एक वर्षे कार्यप्रगति तयार

टीपी भुसाल

कार्यक्रम सार्वजनिक गर्न नपाउँदै अस्ताए मन्त्री अधिकारी काठमाडौं । संस्कृति पर्यटन तथा नागरिक उड्डयन मन्त्रालयले १ वर्षको कार्य प्रगति विवरण तयार पारेको छ । मन्त्रालयले गत वर्ष फागुन ३ गते पर्यटन मन्त्रीको कार्यभार सम्हालेका स्वर्गीय रवीन्द्र अधिकारीको मन्त्रालयमा पदवहालीपछि भएका कार्य प्रगति विवरण सार्वजनिक गर्न लागेको हो । पर्यटनमन्त्री रवीन्द्र अधिकारीको गत फागुन १५ गते हेलिकोप्टर दुर्घटनामा परी निधन नभएको भए अधिकारीले पर्यटन मन्त्रालय सम्हालेको १ वर्षको कार्य प्रगति विवरण सार्वजनिक गरिरहेका हुन्थे होला । तर, आफूले वर्षभरि गरेको कामको प्रगति विवरण सार्वजनिक गर्न नपाई मन्त्री अधिकारीले दुर्घटनामा ज्यान गुमाए । मन्त्रालयले गत वर्ष फागुन ३ गतेदेखि यही फागुन २ गतेसम्मको कार्य प्रगति विवरण सार्वजनिक गर्ने जानकारी दिएको छ । विवरणमा २१२ ओटा सम्पदाको पुनर्निर्माण, गौतमबुद्ध अन्तरराष्ट्रिय विमान स्थलको ६३ प्रतिशत र पोखरा क्षेत्रीय विमानस्थलको २२ प्रतिशत निर्माण कार्य सम्पन्न भएको उल्लेख छ । यस्तै, त्रिभुवन अन्तरराष्ट्रिय विमानस्थल दैनिक २२ घण्टा सञ्चालन, विमानस्थलको पार्किङ एरिया विस्तार, विमान स्थलको अन्तरराष्ट्रिय उडान क्षेत्रतर्फ ६ ओटा साना विमान एयरबस–३२० र ६ ओटा ठूला विमान ३३० गरी थप १२ ओटा विमान पार्किङ गर्न मिल्ने पार्किङ बनिरहेको र आगामी असारसम्ममा सम्पन्न हुने विवरणमा उल्लेख छ । यस्तै, लामो समयदेखि योजनामा मात्र सीमित रहेको विमानस्थलको धावन मार्ग पुनर्निर्माण तथा स्तरोन्नति २०७५ साल असारभित्र सम्पन्न गर्नेगरी कार्य अघि बढेको छ । साथै, विमानस्थल विस्तार तथा स्तरोन्नति गर्ने परियोजनाका कार्य यस अवधिमा ३० प्रतिशत सम्पन्न भई हालसम्मको प्रगति ४० प्रतिशत पुगेको छ भने ६ ओटा विमानस्थलमा रात्रिकालीन उडान शुरू गरिएको छ । झापाको चन्द्रगढी, विराटनगर, जनकपुर, सिमरा, भैरहवा, नेपालगन्ज र धनगढी विमानस्थलमा उपकरण जडान गरी रात्रिकालीन उडानसमेत शुरू गरिएको छ । प्राधिकरणले काठमाडौंबाहेकका विमानस्थल (भैरहवा, नेपालगन्ज, सुर्खेत, पोखरा र विराटनगर) बाट रात्रिकालीन उडान गरी अन्तरप्रदेश, क्षेत्रीय तथा पहाडी क्षेत्रमा उडान सेवा सञ्चालन भएको जानकारी दिएको छ । विवरणमा मुलुकभर सयओटा नयाँ पर्यटकीय गन्तव्य पहिचान गरिएको छ । कार्य सम्पादन पुस्तिकामा सन् २०१८ मा इतिहासमै सबैभन्दा धेरै करीब १२ लाख पर्यटक आगमनलाई पनि समेटिएको छ । जापान, कम्बोडिया, थाइल्यान्ड लगायत मुलुकसँग हवाई सम्झौता पुनरवलोकन गरी हालसम्म ३९ देशसँग हवाई सम्झौतालाई पनि मन्त्रालयले एक वर्षे प्रगति विवरणमा समेटेको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस