३०० मीटर उचाईको नारच्याङ झरना, पर्यटक एकपटक पुगेर मात्रै फर्किन्छन्

ध्रुवसागर शर्मा

वैशाख ४, म्याग्दी । पहाडको टुप्पोबाट कलकल गर्दै झर्ने निकै सुन्दर, आकर्षक र मनमोहक झरना पछिल्लो समय आन्तरिक तथा बाह्य पर्यटकहरुको रोजाइमा पर्न थालेको छ । बेनी–जोमसोम मोटरबाटो (कालीगण्डकी करिडोर) अन्तर्गत कालीगण्डकी नदीको पारीपट्टी उत्तरी म्याग्दीको अन्नपूर्ण गाउँपालिका–४, नारच्याङमा पर्यटकलाई लोभ्याइरहने नारच्याङ झरना कुमारी झरनाको रुपमा परिचित छ ।

समुन्द्री सतहबाट १ हजार ४०० मिटरदेखि १ हजार ७०० मिटरको उचाइमा नारच्याङ झरना रहेको छ । झरनाको मात्रै उचाई ३०० मिटरभन्दा बढी छ । मानव बसोबासभन्दा पहिलेदेखि नै यस ठाउँमा झरना रहेको नारच्याङवासीको अनुमान छ । नारच्याङ झरनामा म्याग्दीसहित देशका विभिन्न स्थानबाट आन्तरिक पर्यटकहरु पुग्ने गरेका छन् । नारच्याङमा स्थानीय आमा समूहको भवनमा बास बसेका विदेशी पर्यटक पनि एकपटक झरनामा पुगेर मात्रै फर्किने गरेका छन् ।

पछिल्लो समय झरनालाई पृष्ठभूमीमा पारेर सेल्फी खिच्नकै लागि भए पनि पर्यटकहरु नारच्याङ झरनामा जाने गरेका छन् । झरनामा पुगेर आसपासका ठाउँमा साइटसिनको मज्जा लिन सकिन्छ । वनभोजका लागि पनि मानिसहरु नारच्याङ झरनामा जाने गरेका छन् ।

नारच्याङ झरनाले गाउँको सुन्दरता बढाउनुका साथै गर्मीयामको समयमा सितलता समेत प्रदान गर्ने गरेको अन्नपूर्ण संरक्षण क्षेत्र आयोजना (एक्याप) नारच्याङका अध्यक्ष तेजबहादुर गुरुङले बताए । उनका अनुसार झरनाको पानीबाट गाउँमा खानेपानीको आपूर्ति, सिँचाई गरिनुका साथै खोलामा माछा मार्ने गरिएको छ ।

नारच्याङ झरनाभन्दा माथि मानवबस्ती नभएको हुँदा झरना सफा र सुन्दर देखिन्छ भने झरनाको तल फेदीमा भुमेथानको मन्दिर रहेको छ । झरनाको सुन्दरतासँगै भुमेथानको मन्दिरले आकर्षण थपेको छ । हरेक वर्षको जेठ/असार महीनामा पूजाआज हुँदै आइरहेको उक्त मन्दिरमा भाकल तथा पूजा गरेमा मनले आँटे, ताकेको र चिताएको काम बन्ने जनविश्वास रहिआएको छ । झरना र मन्दिर जानका लागि त्यहाँसम्म पुग्न क्लबको पहलमा गोरेटो बाटो बनाइएको अन्नपूर्ण युवा क्लब नारच्याङका अध्यक्ष श्याम पूर्जाले बताए ।

पछिल्लो समय पर्यटकीयस्थलका रुपमा चिनिएको नारच्याङ झरनाको विकास र प्रवर्द्धन गर्नका लागि योजना बनाएर अगाडि बढिने नारच्याङका वडा अध्यक्ष चन्द्रप्रसाद फगामीले जानकारी दिए । झरनासम्म पुग्न पक्की पदमार्ग निर्माण गरिने, रेलिङ हालिने र व्यवस्थित सिँढीहरु बनाइने उनले बताए । म्याग्दी सदरमुकाम बेनीबजारबाट ३ घण्टाको यात्रामा सवारीसाधनमार्फत नारच्याङ झरनामा पुग्न सकिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस