ब्रिटिस एअरवेजलाई अहिलेसम्मकै ठूलो जरिवाना

Jul 8, 2019

अन्तरराष्ट्रिय

नरहरि आचार्य असार २३, लण्डन (बेलायत) । बेलायती विमान कम्पनी ब्रिटिस एयरवेजलाई लाखौं यात्रुको डाटा चोरीमा दोषी ठहर गर्दै अहिलेसम्मकै ठूलो जरिवाना गरिएको छ । कम्पनीको स्वामित्व ग्रहणकर्ता इन्टरनेशनल एअरलाइन्स ग्रुप (आईएजी)ले सोमवार एयरवेजलाई १८ करोड ३० लाख ३९ हजार पाउण्ड स्टर्लिङ जरिवाना गरिएको जानकारी दिएको हो । बेलायतको इन्फरमेशन कमिश्नरर्स अफिस (आईसीओ)ले गत वर्ष ल्याएको तथ्यांक सुरक्षाको नयाँ नियमअनुसार एयरवेजलाई जरिवाना गरिएको हो । ह्याकरले गत वर्ष विमानका लाखौं यात्रुहरूको तथ्यांक तथा बैंक विवरण चोरी गरी कानूनविपरीत काम गरेको पाइएको थियो । एयरवेजले आफ्ना प्रयोगकर्ताको तथ्यांकको सुरक्षा गर्न नसकेको आरोप लगाइएको छ । कम्पनीको सुरक्षा प्रणाली कमजोर भएको कारण नै ह्याकरले यात्रुको तथ्यांक चोरी गरेको आईसीओको ठहर छ । आईएजीद्वारा जारी गरिएको विज्ञप्तिमा भनिएको छ, ‘बेलायतको तथ्यांक संरक्षण ऐन अनुसार बेलायतको सूचना आयुक्तको कार्यालयले ब्रिटिस एअरवेजलाई कुल १८ करोड ३० लाख ३९ हजार पाउण्ड स्टर्लिङको जरिवाना गरिएको छ ।’ आईएजीका अनुसार यो जरिवाना रकम ब्रिटिस एयरवेजको सन् २०१७ मा भएको खूद मुनाफाको १ दशमलव ५ प्रतिशत बराबर हो । जरिवानाको समाचार बाहिरिएसँगै सोमवार आईएजीको शेयरको भाउमा पनि कमी आएको छ । रासस/ एएफपी