नेपाल–जापान उडान : प्यासेन्जर सर्भिस एजेन्टमा जापानको एजीटी कम्पनी

टीपी भुसाल

काठमाडौं । नेपाल वायुसेवा निगमले जापानको एडभान्स ग्लोबल ट्रान्सपोर्ट (एजीटी) कम्पनीलाई प्यासेन्जर सर्भिस एजेन्ट (पीएसए) नियुक्त गरेको छ । एजीटी जापानको ट्राभल्स एजेन्ट एचआईएस समूहबाट सम्वर्द्धित कम्पनी हो । यस समूहसँगको सहकार्यमा नेपाल–जापान उडानको निरन्तरतालाई थप सशक्त पार्ने निगमको अपेक्षा छ । 

निगमले वाइडबडीमार्फत आउँदो भदौ १२ गतेबाट जापानको ओसाकामा नियमित उडान गर्ने तयारी गरिरहेको छ । नेपाल–जापान उडानमा निगमलाई आवश्यक यात्री उपलब्ध गराउन एजीटी जापानलाई पीएसए नियुक्त गरिएको निगमका सहप्रवक्ता सुलेश मिश्रले जानकारी दिए ।

निगमले व्यवसाय र सेवा दुवैलाई समायोजन गरी नाफामुखी प्रतिफलका लागि जापान उडान गर्न लागेको बताएको छ । व्यावसायिक उडानमा यात्रु संख्या थप हुँदै जाँदा निर्धारित गन्तव्यप्रतिको आकर्षण बढ्ने विश्वास निगमको छ । राष्ट्रिय ध्वजावाहक निगमको अन्तरराष्ट्रिय उडानले दुई देशबीचको सम्बन्धलाई जनस्तरमा समेत स्थापित एवम् प्रवर्द्धन गर्ने भएकाले आफ्नो गन्तव्य निर्धारण गर्नुका साथै यसको निरन्तरता एवम् व्यावसायिक प्रवर्द्धनमा समेत आफू केन्द्रित भएको निगमले उल्लेख गरेको छ । 

निगमले अघिल्लो साता वाइडबडी मार्फत ओसाका रूटका लागि काठमाडौं–ओसाकाको भाडादर एकतर्फी मूल्य अभिवृद्धि करसहित रू. ३६ हजार ९९९ र  दुईतर्फी भाडा रू. ७२ हजार ८१४ कायम गरेको छ । त्रिभुवन अन्तरराष्ट्रिय विमानस्थलबाट निगमले ओसाका कान्साइ अन्तरराष्ट्रिय विमानस्थलमा मंगलवार, विहीवार र शनिवार गरी साताको तीन दिन उडान गर्ने योजना बनाएकोे छ । एक दशकअघि ओसाकाको कन्साई अन्तरराष्ट्रिय विमानस्थलमा उडान गरेको निगमले जहाज अभावमा ओसाका उडान बन्द गरेको थियो । निगमले वाइडबडी ए–३३० जहाजमार्फत एक दशकपछि पुनः ओसाका उडान गर्न लागेको हो । 

प्रतिक्रिया [0]