नेपाल–जापान पहिलो उडान बिहीवार विहान 

१३० यात्रु लिएर ओसाका जाँदै एनएसी

टीपी भुसाल

काठमाडौं । नेपाली ध्वजावाहक विमानले जापानतर्फ सोझो उडान बिहीवार विहान शुरू गर्दै छ । सीट क्षमता २७४ भएको वाइडबडी एयरबसमा २५ सरकारी अधिकारीसहित १३० यात्रु जापानको ओसाकातर्फ जान लागेको नेपाल वायुसेवा निगम (एनएसी)ले बुधवार साँझ जानकारी दिएको छ । विमानको अभाव देखाउँदै निगमले २०६४ सालदेखि जापानको उडान बन्द गरेको थियो ।

निगमका अनुसार काठमाडौं–ओसाका उडानअवधि ६ घण्टा ३० मिनेटको हुनेछ । ओसाकामा दुई घण्टा रहेर विमान काठमाडौं फर्कनेछ । मंगलवार, बिहीवार र शनिवार गरी सातामा तीनओटा उडान हुनेछन् । निगमले शुरूको एक महीनाका लागि एकतर्फी ३६ हजार ९९९ र दुईतर्फी ७२ हजार ८१४ रुपैयाँ भाडा तय गरेको छ ।

पहिलो उडानमा संस्कृति, पर्यटन तथा नागरिक उड्डयन राज्यमन्त्री धनबहादुर बुढा, मन्त्रालयका सहसचिव, व्यापारिक साझेदारहरू र निगम सञ्चालक समितिका सदस्यहरू पाहुनाका रूपमा सहभागी भएको निगमका प्रवक्ता गणेशबहादुर चन्दले जानकारी दिए ।  

यात्रु अभावका कारण पहिले तय भएको मितिमा उडान गर्न नसकिए पनि अब भने निरन्तर उडान गर्ने निगमका कार्यकारी अध्यक्ष मदन खरेलले जानकारी दिए । बजार अंश बढाउन विभिन्न ट्राभल एजेन्सीसँग सहकार्य गरेको र यसको परिणाम आउन केही समय लाग्ने उनले बताए । अहिले ५० प्रतिशतसम्म यात्रु पाए पनि एकवर्ष भित्रै त्यसलाई ८० प्रतिशतभन्दा बढी पुर्‍याउने लक्ष्य निगमको छ । निगमका अनुसार जापान उडानका लागि ७० प्रतिशत अकुपेन्सी हुँदा खर्च धान्न सकिने (ब्रेक इभन) अवस्था रहनेछ । 

निगमका लागि ओसाका पुरानै गन्तव्य भए पनि सीधा उडान भने पहिलो हो । पहिले काठमाडौंबाट चीनको साङहाईमा ट्रान्जिट गरी जापान उडान हुने गरेको थियो । निगमले पुस (जनवरी) देखि जापानकोे राजधानी टोकियोमा उडान गर्ने तयारी गरिरहेको पनि खरेलले जानकारी दिए । 

प्रतिक्रिया [0]