शेयर कारोबार बन्दको असर : व्यवसायिक रुपमै लाग्नेहरु तनावमा

प्रजिता बुढाथोकी

चैत २४, काठमाडौं । नेपालमा कारोना भाइरस संक्रमण रोकथाम तथा न्यूनिकरणका लागि सरकारले लकडाउन गरेपछि शेयर कारोबार बन्द अबस्थामा रहेको छ । झण्डै दुई सातादेखि नेपाल स्टक एक्सचेञ्ज (नेप्से) ले शेयर कारोबार बन्द गरेको छ ।

सो क्रममा उनीहरु घरमै बसेका त छन् तर कारोबार बन्द हुँदा भने तनावमा रहेको बताएका छन् । शेयर खरीदविक्रीकै आम्दानीबाट गुजारा गर्नेहरु अझै शेयर कारोबार बन्द हुने अवधि लम्बिएपछि तनाब हुन थालेको बताउँछन् ।

शेयर बजार त्यस्तो बजार हो जहाँ तीनदिनभित्र आफ्नो भौतिक सम्पत्तिलाई नगदमा परिणत गर्न सकिन्छ । यस्तो बजारमा सम्पत्ति सुरक्षित गरेका लगानीकर्ताहरु जो यसैबाट आफ्नो आवश्यकता पुरा गर्दै आएका थिए, उनीहरु समस्या परेका छन् । 

पछिल्लो समय बजार घट्दो क्रममा थियो, त्यस्तो अवस्थामा शेयर बेच्न पनि सकिएन अहिले आर्थिक समस्या भयो भन्ने लगानीकर्ता यतिबेला धेरै छन् । यद्यपि सरकारले पूँजिबजार क्षेत्रको लागि पनि केहि राहतको कार्यक्रम ल्याउनु आवश्यक रहेको बताउँछन् । 

सरकारले गत चैत ११ गतेदेखि गरेको लकडाउन थप एक हप्ता लम्व्याउने भएपछि अब कसरी आर्थिक व्यवस्थापन गर्ने भन्ने चिन्तामा लगानीकर्ताहरु यतिखेर परेका हुन् । 

नेप्सेका महाप्रबन्धक चन्द्र सिंह साउदले लकडाउन थप भए शेयर कारोबार बन्दको अवधि पनि थपिने बताए । 

घरभित्रै उपयोगी समय विताइरहेको बताउने लगानीकर्ताहरु तनाव कम गर्न कोही योग ध्यान गरिरहेका छन् त कोहि किताव पढिरहेको बताउँछन् । साताको पाँच दिन शेयर कारोबारको हुने नेपालका सक्रिय शेयर बजारका लगानीकर्ता सकेसम्म ब्रोकर अफिसमै गएर समय विताउँथे । 

अन्य क्षेत्रमा काम गर्नेहरु जस्तै विहान ११ देखि थपिएको पछिल्लो समय अनुसार दिउँसो ४ बजेसम्म फ्लोरसिट हेर्दै लगानी गर्न रुचाउने लगानीकर्ताहरु यतिवेला घरमै बस्न बाध्य भएका छन् ।

नेप्सेको कारोबार बन्द हुने सूचना थाहा पाएपछि व्यवसायिक रुपमा शेयर खरीदविक्रीमा संलगन व्यवसायीहरु भने यतिवेला के गरिरहेका छन् ? उनीहरुको  राय लिन हामीले प्रयास गर्‍यौं ।

नेपाल इन्भेष्टर्स फोरमका सचिव दुर्गा तिवारी व्यवसायिक रुपमा यहि क्षेत्रमा लागेकाले कारोबार बन्द हुँदा समस्या परेको बताउँछिन् । उनले भनिन्, ‘लकडाउन शुरु भएपछि धेरै तनाब छ । कोरोना संक्रमणका कारण घरभित्रै बस्नु परेको अवस्थामा घरभित्रका काम त छँदैछ यी वाहेक कमेडी फिल्महरु हेरीरहेको छु । यो तनाव कम गर्न कमेडी फिल्महरुले सहयोग गरिरहेको छ । यो अवधिमा भारतको शेयर बजार  बुझ्न त्यहाँको बजार सम्बन्धी आधारभूत र प्राविधिक विश्लेषणका भिडियोहरु पनि हेरिरहेको छु । बैदेशिक लगानी भएका बजारमा ती लगानीकर्ताहरुले गर्ने क्रियाकलाप र त्यसले बजारमा पार्ने प्रभावको पनि अध्ययन गरिरहेको छु ।’

 

शेयर लगानीकर्ता दवाव समूहका अध्यक्ष हरि ढकाल शेयर बजारबाटै कमाएर गुजारा गर्नेहरुलाई यतिवेला धेरै असर परेको बताउँछन् ।

उनी भन्छन्, ‘तत्काल राज्यले शेयर बजारका लागि राहतका केहि चिजहरु र बजार थमौतिका केहि नीतिहरु ल्याउनुपर्छ जस्तो लाग्छ । शेयर बजारको विकास र विस्तारका लागि सधै चिन्तित हुने म यतिवेला कितावहरु पढ्न र योग ध्यान गरेर समय विताइरहेको छु । यो समयमा मेरौ पुरानो प्रकाशन गर्न बाँकी रहेको किताबको लेखनलाई पुरा गर्ने प्रयास गर्दैछु । 

नेपाल पूँजीबजार लगानीकर्ता संघकी  अध्यक्ष राधा पोखरेल लकडाउनका कारण शेयर बजारमा निर्भर भएकाहरु बजार बन्द हुदाँ मारमा परेको बताउँछिन् ।  उनी भन्छिन्, ‘विशेष गरी साना लगानीकर्ता जो हरेक दिन शेयर विक्री गरी गुजारा गर्ने गर्दथे उनिहरु यतिवेला समस्यामा छन् । बजार बन्दनै हुन्छ भन्ने कसले पो सोचेको थियो र । यो अवस्थामा पैसाको जोहो गर्न नभ्याउने लगानीकर्ता साथीहरुलाई लामो समय बजार बन्द भयो भने धेरै समस्या हुने देखिन्छ ।’

 

प्रतिक्रिया [1]

---

पुरा नाम: *

इमेल: *

प्रतिकृया: *
पठाउनुहोस