पूँजी संरचना मिलाउन लघुवित्त कम्पनीले शुरु गरे एफपीओ निष्कासन गर्ने तयारी

लक्ष्मी शर्मा

असोज १६, काठमाडौं । केहि लघुवित्त कम्पनीहरुले चुक्तापूँजी पुर्‍याउन एफपीओ (थप साधारण शेयर) निष्कासन गर्ने भएका छन् । यसैक्रममा तीन ओटा लघुवित्त कम्पनीहरु आरम्भ चौतारी लघुवित्त, समाज लघुवित्त र एनआरएन लघुवित्तले एफपीओ निष्कासन गर्ने तयारी गरेका हुन् । 

नेपाल स्टक एक्सचेञ्ज(नेप्से) मा सूचीकृत चार ओटा कम्पनीले सर्वसाधारणलाई आईपीओ जारी नगरेका कम्पनीसँग मर्जमा जाने सम्झौता गरेसँगै एफपीओ निष्कासन गर्ने भएका हुन् । कम्पनीको नियम अनुसार संस्थापक र सर्वसाधारणको शेयर संरचना मिलाउनको लागि पनि लघुवित्त कम्पनीले एफपीओ निष्कासन गर्नुपरेको हो । 

नेप्सेमा सूचीकृत आरम्भ चौतारी लघुवित्त कम्पनीले सिवाईसी नेपाल लघुवित्त र शालिग्राम लघुवित्त वित्तीय संस्थासँग मर्जरमा जान गत असोज ९ गते सम्झौता पत्रमा हस्ताक्षर गरिसकेका छन् । कम्पनीले सूचीकृत नभएका दुई ओटा लघुवित्त कम्पनीसँग मर्ज गर्ने सम्झौता गरेसँगै एफपीओ निष्कासन गर्ने बताएको हो ।  

हाल आरम्भ चौतारी लघुवित्त वित्तीय संस्थाको चुक्तापूँजी रू. २६ करोड ३४ लाख, शालिग्राम लघुवित्तकोे चुक्तापूँजी रू. १ करोड ६८ लाख र सिवाईसी नेपाल लघुवित्तको चुक्तापूँजी रू. ७ करोड रहेको छ । यी तीन ओटै कम्पनी मर्जपछि बन्ने कम्पनीको चुक्तापूँजी रू. ३५ करोड २ लाख पूग्नेछ । 

एनआरएन लघुवित्त वित्तीय संस्था र नेप्सेमा सूचीकृत किसान माइक्रोफाइनान्स बीच एकआपसमा मर्जरमा गएर एनआरएन लघुवित्त वित्तीय संस्थाको नामबाट एकीकृत कारोबार शुरु भइसकेको छ । साबिकको एनआरएन लघुवित्तले क्रियटिभ र रामरोशन लघुवित्तलाई गाभेको थियो भने किसान माइक्रोफाइनान्सले दिब्य लघुवित्तलाई गाभेको थियो । 

एनआरएन लघुवित्तले एफपीओ निष्कासन गर्ने प्रस्ताव पारित गर्नको लागि आगामि असोज १८ गते साधारण सभा बोलाएको छ ।  उक्त साधारण सभाबाट पारित गरी आवश्यक प्रक्रिया पुरा भएपछि कम्पनीले एफपीओ निष्कासन गर्नेछ ।

भर्खरैमात्र आईपीओ निष्कासन गरेको समाज लघुवित्तले पनि एफपीओ निष्कासन गर्ने भएको छ । उक्त कम्पनीले नेप्सेमा सूचीकृत नभएको स्वस्तिक लघुवित्तसँग मर्जर सम्झौता भएसँगै एफपीओ निष्कासन गर्ने तयारी गरेको हो ।

सूचीकृत नभएका कम्पनीसँग मर्ज सम्झौता भएसँगै कम्पनीको शेयर संरचना मिलाउनको लागि एफपीओ निष्कासन गर्नुपर्ने कम्पनीले बताएको छ । स्वस्तिक लघुवित्तसँग मर्जरको लागि उक्त कम्पनीको गत असोज ५ गते मर्जरसम्बन्धी सम्झौता भएको थियो । 

आईपीओ निष्कासन नगरेका कम्पनीले सर्वसाधारणको लागि छुट्याएको शेयर एफपीओ निष्कासन  गरेर पूँजी संरचना पुरा गर्ने तयारी गरेका हुन् । ती कम्पनी बाहेक वोमी लघुवित्त वित्तीय संस्थाले ग्रामिण स्वयमसेबक लघुवित्तसँग मर्जरमा जाने सम्झौता गरेको छ ।  

यी दुई कम्पनी बीच मर्जमा जाने सम्झौता गत भदौ २६ गते भएको थियो । त्यसैगरी नयाँ नेपाल लघुवित्तले सारथि लघुवित्तलाई मर्ज गरी गत असोज ५ गते देखि एकीकृत कारोबार शुरु गरिसकेको छ ।

 त्यसैगरी वोमी लघुवित्त र नयाँ नेपाल लघुवित्त सूचीकृत कम्पनी हुन् । यी दुई कम्पनीले पनि सूचीकृत नभएका कम्पनीलाई मर्जगरेपछि शेयर संरचना मिलाउन लागि एफपीओ निष्कासन गर्ने आन्तरिक तयारी गरेका छन् ।

नेपाल राष्ट्र बैंकले तोकेको चुक्तापूँजी पुर्‍याउनको लागि पनि लघुवित्त कम्पनीहरु धमाधम मर्जरमा जान लागेका छन् । विसं २०७७ साल असार मसान्तसम्ममा ८४ ओटा लघुवित्त कम्पनी केन्द्रीय बैंकमा दर्ता भएका छन् । 
 

केन्द्रीय बैंकले राष्ट्रिय स्तरको लघुवित्त कम्पनीको न्यूनतम चुक्तापूँजी रू. १० करोड, प्रदेश स्तरको कार्यक्षेत्रका लागि रू. ६ करोड, ४ देखि १० ओटा जिल्ला कार्यक्षेत्रको लागि रू. २ करोड र १ देखि ३ ओटा जिल्ला कार्यक्षेत्र रहेको लघुवित्तको लागि रू. १ करोड पूँजी पुर्‍याउनुपर्ने व्यवस्था गरेको छ । सोही कारण पनि लघुवित्त कम्पनीहरु मर्ज तथा एक्विजिशनमा  धमाधम जान थालेका हुन् । 

प्रतिक्रिया [0]