पछिल्लो १० महीनामा ११ ओटा जीवन बीमा कम्पनीको शेयरमूल्य औसत ५० प्रतिशत घट्यो

२०७९ जेठ, २९

लगानी

जेठ २९, काठमाडौं । पछिल्लो समय बजार निरन्तर घट्दो क्रममा छ ।

३ हजार २ ०० विन्दुसम्म पुगेको बजार अहिले २ हजारको हाराहारीमा झरेको छ । उच्च विन्दुबाट बजार घटेर २ हजार विन्दुमा फर्कदा लगानीकर्ताले अर्बौं रूपैयाँ गुमाइसकेका छन् । नेप्सेमा १३ ओटा समूह रहेका छन् ।

१३ ओटा समूहमध्ये जीवन बीमा कम्पनीको शेयरमूल्य पनि निरन्तर घट्दो क्रममा नै रहेको देखिन्छ । नेप्से परिसूचक भदौ २ गते इतिहासकै उच्च विन्दु ३ हजार २०० मा पुग्दाको शेयरमूल्य र २०७९ जेठ २७ गते शुक्रवारको शेयरमूल्यलाई आधार मान्दा जीवन बीमा कम्पनीहरूको शेयरमूल्य निकै सस्तिएको छ । हाल नेप्सेमा १२ ओटा जीवन बीमा कम्पनी सूचीकृत रहेका छन् ।

१२ ओटा कम्पनीमध्ये पछिल्लो समय ९ ओटा जीवन बीमा कम्पनीको मात्र शेयर कारोबार हुने गरेको छ । तीन ओटा कम्पनीको शेयर कारोबार अहिले रोक्का रहेको छ । युनियन लाइफ, गुुराँस लाइफ र प्राइम लाइफ इन्स्योरेन्स एकापसमा मर्जरमा जाने सम्झौता भएसँगै यी कम्पनीहरूको शेयर कारोबार रोक्का भएको हो ।

तथ्यांकमा यी तीन ओटा कम्पनीको शेयर रोक्का भएको अघिल्लो दिन (वैशाख २९ गते) को शेयरमूल्य लिइएको छ । १० महीनाको अवधिमा ११ ओटा कम्पनीको शेयरमूल्य औसत ५० प्रतिशत घटेको छ ।

त्यस्तै सानिमा लाइफ इन्स्योरेन्स कम्पनीले भदौभन्दा पछि आईपीओ निष्कासन गरी दोस्रो बजारमा सूचीकृत गरेको थियो । त्यसैगरी यो कम्पनीको पनि पछिल्लो कारोबार दिनको मात्र शेयरमूल्य लिइएको छ । सोही कारण उक्त कम्पनीको शेयरमूल्य औसतमा देखाइएको छैन । यो कम्पनीबाहेक नेप्सेमा सूचीकृत ११ ओटा कम्पनीको शेयरमूल्यको भने औसत देखाइएको छ ।

११ ओटा कम्पनीमध्ये सबैभन्दा बढी एशियन लाइफ इन्स्योरेन्स कम्पनीको शेयरमूल्य ६१ दशमलव ९९ प्रतिशत घटेको छ । २०७८ भदौ २ गते कम्पनीको शेयरमूल्य प्रतिकित्ता रू.१ हजार ४५५ रहेकोमा २०७९ जेठ २७ गते शुक्रवार प्रतिकित्ता रू. ५५३ मा झरेको हो । यसोत यस कम्पनीले आव २०७६/ ७७ को मुनाफाबाट २५ प्रतिशत बोनस शेयरको समायोजनपछि पनि घटेको हो ।

त्यसैगरी १० महीनाको शेयरमूल्यको तथ्यांक हेर्दा दोस्रोमा नेपाल लाइफ इन्स्योरेन्स कम्पनीको शेयर मूल्य ५८ दशमलव ८५ प्रतिशत घटेको छ । कम्पनीको शेयरमूल्य गत भदौ २ गते प्रतिकित्ता रू.१ हजार ८८२ रहेकोमा जेठ २७ गते प्रतिकित्ता रू. ७७४ दशमलव ४ कायम भएको छ । यसरी हेर्दा महँगोमा शेयर किन्ने लगानीकर्ताहरू धेरै नै मारमा परेको देखिन्छ । महँगोमा शेयर किनेका लगानीकर्ताहरूले बोनस शेयरले पनि घाटा पूर्ति नगरेको बताएका छन् ।

यतिबेला कम्पनीको शेयरमूल्य निकै सस्तिएकाले दीर्घकालीन रूपमा लगानी गर्ने समय आएको बजार विश्लेषकहरू बताउँछन् । दीर्घकालीन रूपमा लगानी गरेमा जीवन बीमा कम्पनीबाट पनि राम्रो प्रतिफल प्राप्त हुने कतिपयको भनाइ छ ।

१२ ओटा कम्पनीमध्ये सबैभन्दा कम शेयरमूल्य रिलायन्स लाइफ इन्स्योरेन्स कम्पनीको रहेको छ । कम्पनीको शेयरमूल्य प्रतिकित्ता रू. ३७० रहेको छ ।