‘महालक्ष्मी कर्पोरेट क्रिकेट लिग’को दोस्रो शृंखला शनिवारदेखि

अभियान संवाददाता

काठमाडौं  । महालक्ष्मी  विकास बैंकले ‘महालक्ष्मी कर्पोरेट क्रिकेट लिग’को  दोस्रो शृंखला आयोजना गर्ने भएको छ । २९औं वार्षिकोत्सवको अवसरमा बैंकले उक्त क्रिकेट लिग आयोजना गर्ने भएको हो । आउँदो शनिवारदेखि सोमवारसम्म ललितपुरको इमाडोलस्थित बलपार्क इन्डोर क्रिकेटमा आयोजना हुने उक्त प्रतियोगितामा विभिन्न बैंक तथा वित्तीय संस्थाका १६ टोलीको सहभागिता रहने बताइएको छ ।

बुधवार आयोजित पत्रकार सम्मेलनमा बैंकका प्रमुख कार्यकारी अधिकृत बोधराज देवकोटाले प्रतियोगिताको विजेता ट्रफी र बैंकका सहायक प्रमुख कार्यकारी अधिकृत जलजकुमार अधिकारीले जर्सी सार्वजनिक गरेका छन् । क्रिकेट लिगका प्राविधिक निर्देशक रविन्द्र गुप्ताले लिगका नियमका बारेमा प्रकाश पार्नुका साथै समूह विभाजन गरेका थिए । बैंकका प्रमुख कार्यकारी अधिकृत देवकोटाले क्रिकेट लिगले बैंक तथा वित्तीय संस्थाबीच आत्मीयता, सद्भाव र मित्रता बढाउन थप सहयोग पुग्ने बताए । 

प्रतिक्रिया [0]