दुई वायुसेवा कम्पनीका तीन हेलिकोप्टर उडानमा रोक

अभियान संवाददाता

काठमाडौं। नेपाल नागरिक उड्डयन प्राधिकरणले दुईओटा वायुसेवा कम्पनीका तीनओटा हेलिकोप्टर उडानमा रोक लगाएको छ । प्राधिकरणले बिहीवारदेखि नै लागू हुने गरी श्री एयरलाइन्सको एउटा हेलिकोप्टर र फिस्टेल हेलिकोप्टर (एएस ३५० बी ३ ई)का दुईओटा हेलिकोप्टर उडानमा प्रतिबन्ध लगाएको हो ।

अर्काे सूचना जारी नहुँदासम्म प्राधिकरणले ती हेलिकोप्टर उडानमा रोक लगाएको छ । सोलुखुम्बु उडानका क्रममा गम्भीर लापरबाही गरेको भन्दै प्राधिकरणले उडानमा प्रतिबन्ध लगाएको हो । सोलुखुम्बुको लुक्लास्थित तेन्जिङ हिलारी विमानस्थलको हेलिप्याडमा हेलिकोप्टर उडान/अवतरणका क्रममा भिजुअल फ्लाइट रुल्स (भीएफआर) मापदण्ड पालना नगरेको भन्दै प्राधिकरणले रोक लगाएको छ ।

प्राधिकरणका सूचना अधिकारी ज्ञानेन्द्र भुलले यस विषयमा शुक्रवारदेखि अनुसन्धान शुरू गरिने र त्यसका लागि समिति गठन समेत हुने जानकारी दिए । मौसम बिग्रेको अवस्थामा पनि ती हेलिकोप्टर उडान गरेको र पटक पटक उडान अवतरण गरेको पाइएको उनले बताए । मौसम प्रतिकूलतामा पनि उडान गरेपछि प्राधिकरणले गम्भीर लापरबाहीको रूपमा लिएको हो । फिस्टेल एयरसँग चारओटा हेलिकोप्टर छन् । तीमध्ये एएस ३५० बी ३ ई फ्लीटका दुई हेलिकोप्टरलाई उडान प्रतिबन्ध लगाइएको छ ।

प्रतिक्रिया [0]