१०० मिलियन डलरसम्म लगानी गर्दै इन्ड्राइभ

अभियान संवाददाता

काठमाडौं। राइड शेयरिङ प्लेटफर्म इन्ड्राइभले सम्भावना भएका विभिन्न स्टार्टअपमा १०० मिलियन डलरसम्म लगानी गर्ने लक्ष्यका साथ न्यू भेन्चर्स इन्भेस्टमेन्टकोे घोषणा गरेको छ । न्यू भेन्चर्सको नेतृत्व भाइस प्रेसिडेन्ट एन्ड्रिज स्मिथलाई दिएको बताइएको छ । कम्पनीले लगानीका लागि मापदण्डसमेत तय गरेको बताएको छ । लगानीका लागि सामाजिक न्याय र व्यक्ति तथा समुदायको जीवनस्तर उकास्ने खालका योजना र विश्वव्यापी विस्तारको सम्भावना भएका स्थानीय स्टार्टअप हुनुपर्ने कम्पनीको भनाइ छ ।

बजारमा स्थापित भएका व्यवसायमा पोस्ट–सीड/प्रि–सिरिजको रूपमा समेत लगानी गर्न सकिने कम्पनीले जानकारी दिएको छ । साथै बजारमा प्रमाणित भइसकेको अवस्थाका स्टार्टअप समेत प्राथमिकतामा पार्न सक्ने कम्पनीको भनाइ छ । भाइस प्रेसिडेन्ट एन्ड्रिज स्मिथले मानिसको जीवनमा सुधार गर्ने किसिमका आविष्कार गर्न सक्षम कम्पनीमा लगानी गर्दै त्यस्ता कम्पनीको क्षमता र पहुँच विस्तारमा सघाउने बताए । इन्ड्राइभका प्रेसिडेन्ट मार्क लर्किनले न्यू भेन्चर्सको मुख्य उद्देश्य परम्परागत इनोभेसन हबहरूभन्दा बाहिरका र बेवास्ता गरिएका तर उच्च वृद्धिको सम्भावना भएका स्टार्टअप पहिचान गर्नु र तिनको सकारात्मक प्रभाव बढाउन सहयोग गर्नु रहेको बताए ।

प्रतिक्रिया [0]