रुकुम पूर्वमा नेपाल टेलिकमको फाइबर सेवा 

अभियान संवाददाता

काठमाडौं। नेपाल टेलिकमले रुकुम पूर्वको सदरमुकाम रुकुमकोटमा एफटीटीएच (फाइबर टु द होम) प्रविधिमार्फत एनटी फाइबर सेवा उपलब्ध गराउने भएको छ । आइतवारदेखि उक्त स्थानमा परीक्षण सेवा प्रारम्भ भएको टेलिकमले जानकारी दिएको छ । अन्तिम प्राविधिक परीक्षणपश्चात् छिट्टै ग्राहकमा समेत सेवा उपलब्ध गराइने प्रवक्ता शोभन अधिकारीले बताए । यसका लागि रुकुमकोटमा दुईओटा एफडीसी (फाइबर डिस्ट्रिब्युसन क्याबिनेट)मार्फत १०२४ लाइन क्षमताको नेटवर्क तयार गरिएको उनको भनाइ छ । यस सेवामार्फत तीव्र गतिको डेटा, भ्वाइस र आईपीटीभी सेवा उपलब्ध गराउन सकिने बताइएको छ । यससँगै एफटीटीएच प्रविधिमार्फत एनटी फाइबर उपलब्ध भएका जिल्लाको संख्या ७४ पुगेको छ । डोल्पा, मुगु र हुम्लामा मात्र यो सेवा पुग्न बाँकी छ । यी जिल्लामा पनि क्रमश: सेवा विस्तार गर्ने कम्पनीको योजना रहेको बताइएको छ । 

प्रतिक्रिया [0]