खैरहनी नगरपालिकामा ‘क्युआर’ कोडमार्फत कर भुक्तानी

अभियान संवाददाता

चितवन। खैरहनी नगरपालिका चितवनले ‘क्युआर’ कोडमार्फत नगरपालिकामा तिर्नुपर्ने कर तिर्ने व्यवस्था लागू गरेको छ । करदातालाई प्रविधिमैत्री र सहज भुक्तानी सुविधा दिने उद्देश्यले यो प्रणालीको शुरुआत गरिएको बताइएको छ । नगरपालिकालाई बुझाउनुपर्ने कुनै पनि प्रकारको कर, दस्तुर वा जरीवाना सेवाग्राहीले तत्काल क्युआर कोडमार्फत तिर्न सक्नेछन् ।

सेवाग्राहीले डिजिटल वालेट वा मोबाइल बैंकिङ एप्लिकेसनमार्फत मनिटरको स्क्रिनमा देखिएको क्युआर कोड स्क्यान गरी भुक्तानीपश्चात् तत्काल रसिद प्राप्त गर्न सक्ने नगरपालिकाका प्रमुख शशिकुमार खनियाँले बताए । 

विद्युतीय भुक्तानी सेवाको विस्तार गर्ने चालू आर्थिक वर्षको नगरपालिकाको नीति तथा कार्यक्रमअन्तर्गत शुरूमा ई–सेवाबाट शुरुआत थियो । भुक्तानी प्रणालीलाई सुधार गरी हाल ई–सेवासँगै खल्ती, कनेक्ट आइपीएस र डायनामिक क्युआर कोडमार्फत भुक्तानीको व्यवस्था गरिएको नगरप्रमुख खनियाँको भनाइ छ । नगर उपप्रमुख कविता उप्रेतीले नगरपालिकाको सेवालाई विद्युतीय शासनमैत्री बनाउँदै नागरिकले नगरपालिकाको सेवा घर–घरबाटै प्राप्त गर्न सक्ने गरी सूचना प्रविधिको उपयोगमा नगरपालिकाले कार्यसम्पादन गरिरहेको बताइन् । नगरपालिकाले यसअघि नै राजस्व रकम अनलाइनमार्फत भुक्तानी गर्न सक्ने प्रणाली लागू गरेको थियो ।

प्रतिक्रिया [0]