जीवन विकास लघुवित्तको १४.७३६९ प्रतिशत लाभांश पारित

अभियान संवाददाता

विराटनगर। जीवन विकास लघुवित्त वित्तीय संस्थाको पाँचौं साधारणसभाले शेयरधनीलाई १४.७३६९ प्रतिशत लाभांश वितरणको प्रस्ताव पारित गरेको छ । आइतवार सम्पन्न सभाले आर्थिक वर्ष २०७९/८० को वितरण योग्य मुनाफाबाट लघुवित्तले १४ प्रतिशत बोनस शेयर र सोको कर प्रयोजनका लागि शून्य दशमलव ७३६९ प्रतिशत नगद लाभांश वितरणको प्रस्ताव पारित गरेको हो ।

बोनस शेयर वितरणपछि संस्थाको चुक्तापूँजी १ अर्ब ३४ करोड ७५ लाख १८ हजार रुपैयाँ पुगेको छ । साधारणसभाले अन्य लघुवित्त संस्थासँगको मर्जर र प्राप्तिका लागि आवश्यक कार्य गर्नका लागि सञ्चालन समितिलाई अधिकार दिने निर्णय पनि गरेको छ । लघुवित्तको साधारणसभालाई सम्बोधन गर्दै सांसद योगेन्द्र मण्डलले लघुवित्तलाई बचाउनुपर्ने अवस्था आएको बताएका छन् । पछिल्लो समय लघुवित्तविरुद्ध विभिन्न अभियान चलिरहेको भन्दै उनले यस्तो समयमा सदस्य केन्द्रित सेवा प्रदान गरेर लघुवित्तलाई जोगाउनुपर्ने धारणा राखे ।

संस्थाका अध्यक्ष विक्रमराज सुवेदीले विश्वव्यापी आर्थिक मन्दी र समुदायमा बैंक तथा वित्तीय संस्थाविरुद्धको गतिविधिले गर्दा गतवर्ष चुनौतीपूर्ण रूपमा बितेको बताए । यद्यपि विपन्न तथा असहाय परिवारलाई आयमूलक कार्यमा सामेल गराई सहयोग गर्ने लघुवित्तको काम प्रभावकारी रूपमा अघि बढेको उनको भनाइ थियो । यसैगरी संस्थाका प्रमुख कार्यकारी अधिकृत सञ्जयकुमार मण्डलका अनुसार २४ जिल्लामा फैलिएको जीवन विकास लघुवित्तमा ३ लाख ४ हजार सक्रिय सदस्य छन् । 

संस्थाका सञ्चालक समिति सदस्य गोकर्ण खतिवडाले जीवन विकास लघुवित्तले अघि सारेका योजनालाई जीवन विकासवादको रूपमा विकास गरेर लैजानुपर्ने बताए । उक्त लघुवित्तका सञ्चालक सदस्य इन्द्रनारायणदेव वैश्यले लघुवित्तले शुरू गरेका राम्रा कार्यलाई निरन्तरता दिनुपर्ने बताए ।

प्रतिक्रिया [0]