क्लुनीको घरमा ओबामाले उठाए डेढ करोड डलर

Krishna Giri

क्लुनीको घरमा ओबामाले उठाए डेढ करोड डलर


सन् २०१२ को नोभेम्बरमा हुने राष्ट्रपतीय निर्वाचनको दौडाहामा निस्केका अमेरिकी राष्ट्रपति बाराक ओबामाले एकै दिनमा डेढ करोड डलर चन्दा उठाएका छन् । बिहीवार प्रख्यात हलिउड अभिनेता जर्ज क्लुनीको घरमा आयोजित एक कार्यक्रममा उपस्थित दाताहरुले चुनावी खर्चका रुपमा उदारतापूर्वक दिएपछि ओबामाले यो कीर्तिमानी रकम उठाएका हुन् ।

ओबामा तथा डेमोक्र्याटिक पार्टीको लामो समयदेखिका समर्थक क्लुनीले लस एञ्जल्स शहरस्थित निवासमा आयोजना गरेको ‘फण्डरेजिङ’ कार्यक्रममा रोबर्ट डाउनी जुनियर, ज्याक ब्ल्याक, सलमा हायक र जर्ज क्लुनीकी प्रेमिका स्टेसी गिब्लरलगायत हलिउडका हस्ती सामेल थिए । त्यस अवसरमा उपस्थित १ सय ५० समर्थकसँग राष्ट्रपति ओबामाले व्यक्तिगत रुपमै भेटघाट गर्दै एक डिनरमा समेत सामेल भएका थिए ।

फण्डरेजिङ कार्यक्रममा सहभागी हुन प्रतिव्यक्ति ४० हजार डलर शुल्क तोकिएको थियो । यो शुल्कबाट मात्रै ६० लाख डलर उठेको बताइएको छ । त्यसैगरी कुल रकममध्ये बाँकी साना चन्दादाताका लागि आयोजित राफल चिट्ठाबाट उठेको थियो । राफल जितेका दुई महिला आफ्ना श्रीमान्का साथ डिनरमा सहभागी भए ।

अमेरिकामा फण्डरेजिङ कार्यक्रमका क्रममा एकै दिनमा उठेको यो चन्दा रकम अहिलेसम्मकै सबैभन्दा बढी हो । कार्यक्रममा ओबामाले ह्वाइटहाउसमा पुनः आसीन हुने यो बाटो अघिल्लो निर्वाचनभन्दा फरक हुने ठट्यौलो पारामा बताए । ‘सन् २००८ को निर्वाचन एकप्रकारले चट्याङलाई बोतलभित्र बन्द गर्नुजस्तो थियो (इट वाज लाइक लाइटनिङ इन ए बोटल)’, ओबामाले भने । उनले ४ वर्षका आर्थिक अप्ठ्याराले अमेरिकीलाई परिवर्तन गरेको उल्लेख गरे ।

प्रतिक्रिया [0]